കോഴിക്കോട്: കെട്ടിടങ്ങള്‍ക്ക് അഞ്ചു വര്‍ഷത്തെ മുന്‍കാല പ്രാബല്യത്തോടെ നികുതി അടക്കണമെന്ന സര്‍ക്കാര്‍ തീരുമാനത്തിന് ഹൈക്കോടതിയുടെ സ്‌റ്റേ.
മുനിസിപ്പല്‍ പരിധിയിലെ കെട്ടിടങ്ങള്‍ക്ക് അഞ്ചുവര്‍ഷത്തെ മുന്‍കാല പ്രാബല്യത്തോടെ നികുതി അടക്കാന്‍ ആവശ്യപ്പെട്ടുകൊണ്ടു പാലക്കാട് നഗരസഭ നല്‍കിയ നോട്ടിസിനെതിരേ കേരള ബില്‍ഡിങ് ഓണേഴ്‌സ് അസോസിയേഷന്‍ നല്‍കിയ റിട്ട് ഹരജിയിലാണ് സ്‌റ്റേ.
മുനിസിപ്പല്‍ പ്രദേശങ്ങളിലെ കെട്ടിടങ്ങളുടെ മുന്‍കാല നികുതി ഈടാക്കുന്നതിനാണ് ഇപ്പോള്‍ സ്‌റ്റേ. കേരളാ ബില്‍ഡിങ് ഓണേഴ്‌സ് അസോസിയേഷന്‍ റിട്ട് സമര്‍പ്പിച്ചതിനാല്‍ അസോസിയേഷന്‍ അംഗത്വമുള്ളവര്‍ക്ക് മാത്രമേ സ്‌റ്റേ ബാധകമാകൂവെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. കോര്‍പറേഷന്‍, പഞ്ചായത്ത് തലത്തിലും മുന്‍കൂര്‍ പ്രാബല്യത്തില്‍ നികുതി അടക്കാന്‍ ആവശ്യപ്പെടുന്നുണ്ടെന്നും ഇതിനെതിരേയും കോടതിയെ സമീപിക്കുമെന്നും അവര്‍ അറിയിച്ചു.
കെ.ബി.ഒ.എ സംസ്ഥാന പ്രസിഡന്റ് അഡ്വ. എം. മുഹമ്മദ്, ജനറല്‍ സെക്രട്ടറി എന്‍ജിനീയര്‍ പി. മമ്മു, കോഴിക്കോട് ജില്ലാ പ്രസിഡന്റ് പി.പി ആലികോയ, സെക്രട്ടറി എ.കെ മുഹമ്മദലി, അഡ്വ. പി.എസ് രാമലിംഗം, ഗുരുദാസ്, എം. അസൈനാര്‍ ഹാജി, എസ്.കെ അബൂബക്കര്‍ വാര്‍ത്താസമ്മേളനത്തില്‍ സംബന്ധിച്ചു.