കല്‍പ്പറ്റ: ഈവര്‍ഷത്തെ എസ്.എസ്.എല്‍.സി പരീക്ഷ ഇന്ന് തുടങ്ങും. ജില്ലയില്‍ രണ്ട് ടെക്‌നിക്കല്‍ സ്‌കൂള്‍ ഉള്‍പ്പടെ 88 സെന്ററുകളിലായി 12548 വിദ്യാര്‍ഥികളാണ് പരീക്ഷയെഴുതുന്നത്. മലയാളം ഒന്നാം പേപ്പറാണ് ആദ്യ പരീക്ഷ.
ഉച്ചക്ക് 1.45 മുതല്‍ 3.30 വരെയാണ് പരീക്ഷ. ബാങ്ക് ലോക്കറില്‍ സൂക്ഷിച്ചിരുന്ന ചോദ്യപേപ്പറുകള്‍ പരീക്ഷക്ക് മണിക്കൂറുകള്‍ക്ക് മുന്‍പ് പുറത്തെടുക്കും. ആദ്യ പതിനഞ്ച് മിനിറ്റ് കൂള്‍ടൈം ആണ്. രണ്ടിനാണ് പരീക്ഷ ആരംഭിക്കുന്നത്. ഈ മാസം 27 വരെയാണ് പരീക്ഷ നടക്കുക. വെള്ളിയാഴ്ച പരീക്ഷ ഒഴിവാക്കിയിട്ടുണ്ട്. കുറ്റമറ്റ രീതിയില്‍ പരീക്ഷ നടത്താന്‍ വേണ്ട എല്ലാ ഒരുക്കങ്ങളും പൂര്‍ത്തിയാക്കിയതായി വിദ്യാഭ്യാസ ഓഫിസര്‍ പ്രഭാകരന്‍ പറഞ്ഞു. ഇന്ത്യയില്‍ ശക്തവും വ്യവസ്ഥാപിതവുമായി പരീക്ഷ നടത്തുകയും മൂല്ല്യനിര്‍ണയവും ഫലപ്രഖ്യാപനവും സമയബന്ധിതമായി പൂര്‍ത്തിയാക്കുകയും ലക്ഷകണക്കിന് കുട്ടികള്‍ പങ്കെടുക്കുകയും ചെയ്യുന്ന ഒട്ടേറെ പ്രതീക്ഷയും പ്രത്യേകതയുമുള്ള പരീക്ഷകളിലൊന്നാണ് എസ്.എസ്.എല്‍.സി പൊതുപരീക്ഷ. കേരളത്തില്‍ നടക്കുന്ന എസ്.എസ്.എല്‍.സി, ഹയര്‍ സെക്കന്‍ഡറി (പ്ലസ്.ടു), പരീക്ഷകള്‍ യു.എ.ഇ ഉള്‍പ്പെടെ ഗള്‍ഫ് നാടുകളിലും ലക്ഷദ്വീപിലും ഇതെ സമയം നടക്കുന്നുണ്ട് എന്നതും ശ്രദ്ധേയമാണ്. എസ്.എസ്.എല്‍.സി, ഹയര്‍ സെക്കന്‍ഡറി (പ്ലസ്.ടു), വൊക്കേഷനല്‍ ഹയര്‍ സെക്കന്‍ഡറി (വി.എച്ച്.എസ്.സി) എന്നീ പരീക്ഷകള്‍ മാര്‍ച്ച് എട്ട് മുതല്‍ 27 വരെയാണ് നടക്കുന്നത്. ഉന്നത നിലവാരം പുലര്‍ത്തുന്ന സ്ഥാപനത്തില്‍ പഠിക്കാന്‍, ഉയര്‍ന്ന ജോലി സ്വന്തമാക്കാന്‍ , സമൂഹത്തില്‍ പരിഗണന നേടിയെടുക്കാന്‍, ജീവിത ശൈലി കാലഘട്ടത്തിനനുസരിച്ച് മാറ്റിയെടുക്കാന്‍, ചിന്തയും ചിന്താഗതികളും പരിപോഷിപ്പിക്കാന്‍ വിദ്യാഭ്യാസം അനിവാര്യമാണ്. മല്‍സര - യോഗ്യതാ പരീക്ഷകളിലും മറ്റും മനക്കരുത്തോടെ പങ്കെടുക്കാനും നല്ല വിദ്യാഭ്യാസം വേണം. അതിനായുള്ള ആദ്യപടിയായുള്ള എസ്.എസ്.എല്‍.സി പാസാവാതെ തുടര്‍ പഠനമില്ല. വിദ്യാഭ്യാസത്തിന്റെ പടവുകള്‍ കയറാന്‍ പത്തനിവാര്യം എന്നതാണ് വസ്തുത.