തൃപ്പൂണിത്തുറ: പുതിയകാവ്- കുരീക്കാട് റോഡില്‍ രാത്രിയില്‍ കക്കൂസ് മാലിന്യങ്ങള്‍ തള്ളുന്നത് പതിവാകുന്നു. രാത്രിയുടെ മറവില്‍ ആണ് മാലിന്യങ്ങള്‍ തള്ളുന്നത് തകൃതിയായി നടക്കുന്നത്. കുരീക്കാട് റോഡിന്റെ ഇരുവശങ്ങളിലുമുള്ള കാടുപിടിച്ചു കിടക്കുന്ന സ്ഥലത്താണ് മാലിന്യങ്ങള്‍ നിക്ഷേപിക്കുന്നത്.
കക്കൂസ് മാലിന്യങ്ങളും മറ്റ് മാലിന്യങ്ങളും കുമിഞ്ഞുകൂടിയതിനാല്‍ പരിസരം ദുര്‍ഗന്ധപൂരിതമാണ്. വിദ്യാര്‍ഥികളടക്കം നിരവധി യാത്രക്കാര്‍ കടന്നുപോകുന്ന റോഡരുകില്‍ മാലിന്യങ്ങള്‍ നിക്ഷേപിക്കുന്നത് നാട്ടുകാര്‍ക്കും പ്രദേശവാസികള്‍ക്കും ബുദ്ധിമുട്ടായി മാറിയിരിക്കുന്നു. അധികൃതര്‍ അടിയന്തിരമായി ഇക്കാര്യത്തില്‍ നടപടിയെടുക്കണമെന്ന് പ്രദേശവാസികള്‍ ആവശ്യപ്പെട്ടു.