തിരുവനന്തപുരം: യൂത്ത് കോണ്‍ഗ്രസിന്റെ പുതിയ ഭാരവാഹികള്‍ ചുമതലയേറ്റു. കെ.പി.സി.സി ഓഫിസിലെ രാജീവ് ഗാന്ധി ഹാളില്‍ തിങ്ങിനിറഞ്ഞ പ്രവര്‍ത്തകരുടെയും നേതാക്കളുടെയും സാന്നിധ്യത്തിലാണ് സംസ്ഥാന പ്രസിഡന്റായി ഷാഫി പറമ്പില്‍ അടക്കമുള്ളവര്‍ ചുമതലയേറ്റത്.
സമ്മേളനം കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ ഉദ്ഘാടനം ചെയ്തു. യൂത്ത് കോണ്‍ഗ്രസ് മുന്‍ സംസ്ഥാന പ്രസിഡന്റ് ഡീന്‍ കുര്യാക്കോസ് അധ്യക്ഷനായിരുന്നു. പാര്‍ട്ടിയുടെ സന്ദേശം ഗ്രാമഗ്രാമാന്തരങ്ങളിലെത്തിക്കാന്‍ യുവാക്കള്‍ക്ക് കഴിയണമെന്ന് മുല്ലപ്പള്ളി പറഞ്ഞു. കോണ്‍ഗ്രസിനെ ദുര്‍ബലപ്പെടുത്തുന്ന ഒരു നീക്കവും അനുവദിക്കില്ലെന്ന് മറുപടി പ്രസംഗം നടത്തിയ ഷാഫി പറമ്പില്‍ പറഞ്ഞു. യൂത്ത് കോണ്‍ഗ്രസിന്റെ ആദ്യ സംസ്ഥാന കമ്മിറ്റി 11ന് കെ.പി.സി.സി ഓഫിസില്‍ ചേരും.
പ്രതിപക്ഷ നേതാവ് രമേശ് ചെന്നിത്തല, യു.ഡി.എഫ് കണ്‍വീനര്‍ ബെന്നി ബെഹനാന്‍, കെ.പി.സി.സി മുന്‍ പ്രസിഡന്റ് എം.എം ഹസന്‍ തുടങ്ങിയവര്‍ പങ്കെടുത്തു.