ബെയ്ജിങ്: ആണവ മിസൈല്‍ പരീക്ഷണ നീക്കത്തില്‍ ഉത്തര കൊറിയക്കും അമേരിക്കക്കും മുന്നറിയിപ്പുമായി ചൈന രംഗത്ത്. മേഖലയില്‍ ഏറ്റുമുട്ടലിനാണ് ഇരുരാഷ്ട്രങ്ങളും ശ്രമിക്കുന്നതെന്ന് ചൈന ആരോപിച്ചു.
ദക്ഷിണ കൊറിയയില്‍ വിവാദമായ മിസൈല്‍ പ്രതിരോധ സംവിധാനം ഒരുക്കാനുള്ള നീക്കത്തില്‍നിന്ന് പിന്മാറണമെന്ന് ചൈനീസ് വിദേശകാര്യ മന്ത്രി വാങ് യീ അമേരിക്കയോട് ആവശ്യപ്പെട്ടു. ആണവ മിസൈല്‍ പരീക്ഷണത്തിനുള്ള നീക്കം നിര്‍ത്തിവയ്ക്കണമെന്ന് ഉത്തര കൊറിയക്കും ശക്തമായ ഭാഷയില്‍തന്നെ ചൈന താക്കീത് നല്‍കിയിട്ടുണ്ട്. മുഖാമുഖം വരുന്ന രണ്ട് ട്രെയിനുകളെ നിയന്ത്രിക്കുന്ന പോലെയാണ് ഇരുരാഷ്ട്രങ്ങളുടെയും സമീപനം. പരസ്പരം ഏറ്റുമുട്ടാനാണോ ഇരുവരും തയാറെടുക്കുന്നതെന്ന് വാങ് യീ ചോദിച്ചു.
ഉത്തര കൊറിയ നാല് ബാലിസ്റ്റിക് മിസൈലുകള്‍ വിക്ഷേപിക്കുകയും അമേരിക്ക ദക്ഷിണ കൊറിയയില്‍ ടെര്‍മിനല്‍ ഹൈ ആള്‍ടിറ്റിയൂഡ് ഏരിയാ ഡിഫന്‍സ് (താഡ്) മിസൈല്‍ പ്രതിരോധ കേന്ദ്രം സ്ഥാപിക്കാനുള്ള പ്രാരംഭ നടപടികള്‍ ആരംഭിക്കുകയും ചെയ്തതിനു പിറകെയാണ് ചൈന ഇരുരാജ്യങ്ങള്‍ക്കും ഭീഷണിയുമായി രംഗത്തെത്തിയത്. താഡ് കേന്ദ്രം ആരംഭിച്ചാല്‍ മേഖലയില്‍ രാജ്യങ്ങള്‍ തമ്മിലുള്ള ആയുധപ്പന്തയത്തിനിടയാക്കുമെന്ന് ചൈനീസ് മാധ്യമങ്ങളും മുന്നറിയിപ്പ് നല്‍കിയിരുന്നു.