തൊടുപുഴ: വലിയ കുണ്ടും കുഴിയുമായി കിടന്ന ഭാഗം നന്നാക്കാതെ കാര്യമായി തകരാറില്ലാതെ കിടന്ന റോഡ് ഭാഗം മാത്രം ടാര്‍ ചെയ്ത് പൊതുമരാമത്ത് അധികൃതരും കരാറുകാരനും സ്ഥലം വിട്ടു. കാരിക്കോട് -തെക്കുംഭാഗം റോഡ് അറ്റകുറ്റ പണികള്‍ നടത്തിയവരാണ് നാട്ടുകാര്‍ക്കു എട്ടിന്റെ പണി കൊടുത്ത് മൂന്നാഴ്ച മുമ്പ് പോയത്. കാര്യമായി തകരാറില്ലാത്ത റോഡ് മൊത്തമായി ടാര്‍ചെയ്ത ഇവര്‍ വലിയ കുണ്ടും കുഴിയുമായി കിടക്കുന്ന ബാക്കി ഭാഗത്തെ കുഴിപോലും അടയ്ക്കാതെയാണ് പണി നിര്‍ത്തി പോയത്.
രണ്ടു വര്‍ഷത്തിലേറെയായി തകര്‍ന്നു കിടക്കുന്ന കാരിക്കോട്- തെക്കുംഭാഗം റോഡില്‍ കാരിക്കോട് മുതല്‍ തെക്കുംഭാഗം മലങ്കര ഗെയ്റ്റ് വരെയുള്ള റോഡ് കഴിഞ്ഞ വര്‍ഷം പാച്ചുവര്‍ക്കിന് ടെണ്ടര്‍ എടുത്തതാണ്. എന്നാല്‍ കരാറുകാരന്‍ കാരിക്കോട് മുതല്‍ 1 കിലോമീറ്റര്‍ ഭാഗം മാത്രമാണ് കുഴിടയച്ചത്. ബാക്കി 3 കിലോമീറ്റര്‍ ഭാഗം ഒന്നും ചെയ്തില്ല. ഇതോടെ റോഡ് വലിയ കിടങ്ങുകളായി മാറി. ഇത്തവണയും കാരിക്കോട് മുതല്‍ കഴിഞ്ഞ വര്‍ഷം കുഴിയടച്ച ഭാഗത്ത് 1 കിലോമീറ്റര്‍ വീണ്ടും കുഴിടയച്ചു. ഇതിനു ശേഷമുള്ള തകര്‍ന്ന് കിടക്കുന്ന ഒന്നര കിലോമീറ്ററോളം ഭാഗം ഒന്നും ചെയ്തില്ല. ഇത് കഴിഞ്ഞുള്ള 400 മീറ്ററോളം ഭാഗത്ത് കാര്യമായി തകരാതിരുന്ന റോഡ് മൊത്തമായി ടാര്‍ ചെയ്തുവന്നാണ് പരാതി. കീരികോട് , കാപ്പിത്തോട്ടം, കല്ലാനിക്കല്‍ സ്‌കൂള്‍ ജംഗ്ഷന്‍, തടിപ്പാലം , മലങ്കര ഗെയ്റ്റ് തുടങ്ങിയ ഭാഗത്തുമെല്ലാം റോഡ് ഗതാഗത യോഗ്യമല്ലാതെ തകര്‍ന്നു കിടക്കുകയാണ്.