തിരുവനന്തപുരം: ഗള്‍ഫ് രാജ്യങ്ങളിലെ പ്രവാസികളായ മലയാളികള്‍ മരണപ്പെട്ടാല്‍ മൃതദേഹം നാട്ടിലെത്തിക്കുന്നതിനുള്ള ചെലവ് ഇനിമുതല്‍ നോര്‍ക്ക വഹിക്കുമെന്ന് ധനമന്ത്രി തോമസ് ഐസക്.
പ്രവാസികളുടെ ഏറെക്കാലമായുള്ള ആവശ്യമാണ് ഈ ബജറ്റില്‍ ധനമന്ത്രി തോമസ് ഐസക് പ്രഖ്യാപിച്ചിരിക്കുന്നത്. ഇതിനുപുറമേ ഒരുലക്ഷത്തില്‍ താഴെ വരുമാനമുള്ള തിരിച്ചുവന്ന പ്രവാസികള്‍ക്ക് അടിയന്തിരഘട്ടത്തില്‍ ധനസഹായം നല്‍കുന്ന സാന്ത്വനം പദ്ധതിക്കായി 25 കോടി രൂപ ബജറ്റില്‍ വകയിരുത്തി. പ്രവാസി സംരംഭകര്‍ക്ക് മൂലധന സബ്‌സിഡിയും പലിശസബ്‌സിഡിയും നല്‍കുന്നതിന് 15 കോടി രൂപയും വകയിരുത്തിയിട്ടുണ്ട്.
പ്രവാസികള്‍ക്കുള്ള 2000 രൂപ പെന്‍ഷന്‍ പദ്ധതി അപര്യാപ്തമാണെന്ന വിമര്‍ശനങ്ങളുടെ പശ്ചാത്തലത്തില്‍ പ്രവാസി ക്ഷേമ ബോര്‍ഡ് ഒരു നിക്ഷേപ ഡിവിഡന്റ് പദ്ധതിക്ക് രൂപം നല്‍കിയെന്ന് ധനമന്ത്രി അറിയിച്ചു. അഞ്ചു ലക്ഷം രൂപയോ അതിന്റെ ഗുണിതങ്ങളോ സ്ഥിരം നിക്ഷേപിച്ചാല്‍ അഞ്ചുവര്‍ഷം കഴിയുമ്പോള്‍ പ്രവാസിക്കോ അവകാശിക്കോ നിശ്ചിത തുക മാസവരുമാനമായി ലഭിക്കുന്നതാണ് പദ്ധതി.
ക്ഷേമപെന്‍ഷന്‍ കൂടി ഇതുമായി ലയിപ്പിച്ച് ധനസഹായം നല്‍കുന്നത് പരിഗണിക്കുമെന്നും ധനമന്ത്രി അറിയിച്ചു. ഇപ്പോള്‍ യു.എ.ഇയില്‍ മാത്രമുള്ള പ്രവാസി ചിട്ടി ഈ മാസം മറ്റു ഗള്‍ഫ് രാജ്യങ്ങളിലേക്കു വ്യാപിപ്പിക്കും. ഏതാനും മാസങ്ങള്‍ കഴിയുമ്പോള്‍ ലോകത്ത് എവിടെനിന്നും ചിട്ടിയില്‍ ചേരാനാകും.
ലോക കേരളസഭയുടെ തുടര്‍പ്രവര്‍ത്തനങ്ങള്‍ക്കായി 81 കോടി രൂപ വകയിരുത്തി. എന്‍.ആര്‍.കെ വെല്‍ഫയര്‍ ഫണ്ടിന് ഒന്‍പത് കോടി രൂപയും പ്രവാസികളുടെ പുനരധിവാസ പരിപാടികള്‍ക്ക് 15 കോടി രൂപയും വകയിരുത്തിയിട്ടുണ്ട്.