മഞ്ചേരി: സ്വകാര്യ പാര്‍ക്കിലേക്കു വിനോദയാത്രയ്‌ക്കെത്തിയ സംഘത്തെ മര്‍ദിച്ചതായി പരാതി. സംഭവത്തില്‍ കൊടുവള്ളി സ്വദേശികളായ മുഹമ്മദ് അലി (31), ജബ്ബാര്‍ (34), ഫസ്‌ന (26), എല്‍.കെ.ജി വിദ്യാര്‍ഥി ഇഷാന്‍ മുഹമ്മദ് (നാല്) എന്നിവര്‍ക്കു പരു ക്കേറ്റു. ഇവര്‍ മഞ്ചേരി മെഡിക്കല്‍ കോളേജില്‍ ചികിത്സ തേടി.
കൊടുവള്ളി മാനിപുരം പട്ടിണിക്കര മഹല്ല് കമ്മിറ്റിയുടെ കീഴില്‍ പ്രവര്‍ത്തിക്കുന്ന അല്‍ ഹിലാല്‍ ഇംഗ്ലീഷ് അക്കാദമിയിലെ വിദ്യാര്‍ഥികളെയും രക്ഷിതാക്കളെയുമാണ് പാര്‍ക്കിലെ ജീവനക്കാര്‍ മര്‍ദിച്ചത്. രാവിലെ പാര്‍ക്കിലെക്കെത്തിയതായിരുന്നു അന്‍പതോളം വരുന്ന സംഘം.
ഉച്ചയ്ക്ക് 12.45ഓടെ ഭക്ഷണം കഴിക്കാന്‍ കാന്റീനിലെത്തി. ഭക്ഷണം വിളമ്പുന്നതുമായി ബന്ധപ്പെട്ട തര്‍ക്കമാണ് അക്രമത്തിലേക്കു നയിച്ചത്. രക്ഷിതാക്കളെ മര്‍ദിക്കുകയും വിദ്യാര്‍ഥികളെ ഭീഷണിപ്പെടുത്തുകയും ചെയ്തതായും പത്തോളം വരുന്ന സംഘമാണ് മര്‍ദിച്ചെതെന്നും പരുക്കേറ്റവര്‍ പറഞ്ഞു. മഞ്ചേരി പൊലിസില്‍ പരാതി നല്‍കിയിട്ടുണ്ട്.