കാലടി: കാലടി സംസ്‌കൃത സര്‍വകലാശാലക്ക് സമീപം നിരോധിത പുകയില ഉല്‍പ്പന്നങ്ങളുമായി രണ്ട് അസം സ്വദേശികളെ പൊലിസ് പിടികൂടി. സുല്‍ഫിക്കര്‍ അലി, ഇസ്രാഫുല്‍ അലി എന്നിവരാണ് പിടിയിലായത്. ഇവരില്‍ നിന്നും 6000 പായ്ക്കറ്റ് പുകയില ഉല്‍പ്പന്നങ്ങള്‍ കണ്ടെടുത്തു. മാര്‍ക്കറ്റില്‍ രണ്ടര ലക്ഷത്തോളം വില വരും.
അന്യസംസ്ഥാനങ്ങളില്‍ നിന്നും ട്രെയിന്‍ മാര്‍ഗ്ഗം അങ്കമാലി വരെ കൊണ്ടുവരുന്ന ലഹരി ഉല്‍പ്പന്നങ്ങള്‍ അവിടെ നിന്നും ഓട്ടോറിക്ഷയിലും ബൈക്കുകളിലുമായി വിദ്യാഭ്യാസ സ്ഥാപനങ്ങള്‍ കേന്ദ്രീകരിച്ച് വില്‍പ്പന നടത്തുന്നു. വിദ്യാര്‍ഥികളാണ് ഇവരുടെ മുഖ്യ ഉപഭോക്താക്കള്‍. പെരുമ്പാവൂര്‍ ആസ്ഥാനമായാണ് ഈ സംഘം പ്രവര്‍ത്തിച്ചു വരുന്നതെന്ന് കാലടി പൊലിസ് പറഞ്ഞു.