റിയാദ്: സഊദിയിലേക്കുള്ള മുഴുവൻ അന്താരാഷ്ട്ര വിമാന സർവ്വീസുകളും നിർത്തി വെക്കുന്നതായി സഊദി ആഭ്യന്തര മന്ത്രാലയം അറിയിച്ചു. കോവിഡ് 19 വ്യാപനം തടയുന്നതിന്റെ ഭാഗമായാണ് നടപടി. ഞായർ രാവിലെ മുതൽ രണ്ടാഴ്ച കാലത്തേക്കാണ് നടപടി. അസാധാരണമായ കേസുകൾ ഒഴികെ യാത്രക്കാർക്കുള്ള അന്താരാഷ്ട്ര വിമാന സർവീസുകൾ രണ്ടാഴ്ചത്തേക്ക് താൽക്കാലികമായി നിർത്തിവയ്ക്കാൻ സഊദി സർക്കാർ തീരുമാനിച്ചതായി സഊദി വാർത്താ ഏജൻസി റിപ്പോർട്ട് ചെയ്തു. നേരത്തെ അനിശ്ചിത കാലത്തേക്കെന്ന് പറഞ്ഞതോടെ പ്രവാസികള്‍ ആശങ്കയിലായിരുന്നു.

      വിമാനങ്ങൾ താൽക്കാലികമായി നിർത്തിവച്ചതിനാൽ രാജ്യത്തേക്ക് മടങ്ങാൻ കഴിയാത്ത പൗരന്മാർക്കും താമസക്കാർക്കും സഊദി  അറേബ്യ  ഔദ്യോഗിക അവധി പ്രഖ്യാപിച്ചിട്ടുണ്ട്. കൊറോണ വൈറസ് ബാധിച്ച രാജ്യങ്ങളിലേക്കുള്ള വിമാനങ്ങൾ നിർത്തിവയ്ക്കുക, ടൂറിസ്റ്റ് വിസ താൽക്കാലികമായി നിർത്തുക, എല്ലാ പൊതു പരിപാടികളും നിരോധിക്കുക എന്നിവയടക്കം വൈറസ് ബാധ തടയുന്നതിന്റെ ഭാഗമായി നിരവധി മുൻകരുതൽ നടപടികൾ സഊദി നടപ്പാക്കിയിട്ടുണ്ട്.
     അതിനിടെ, രാജ്യത്ത് ഇന്നലെ 24 കോവിഡ് 19  കേസുകൾ കൂടി റിപ്പോർട്ട് ചെയ്തു. ഇതോടെ രാജ്യത്തെ കൊറോണ ബാധിതരുടെ എണ്ണം 86 ആയി ഉയർന്നിട്ടുണ്ട്.