തിരുവനന്തപുരം: കൊവിഡ് നിരീക്ഷണത്തിലിരിക്കെ ബ്രിട്ടിഷ് പൗരന്‍ കൊച്ചി നെടുമ്പാശേരി വിമാനത്താവളത്തിലെത്തി നാട്ടിലേക്ക് കടക്കാന്‍ ശ്രമിച്ച സംഭവത്തില്‍ റിസല്‍ട്ട് വരുന്നതിന് തൊട്ട് മുന്‍പേ തന്നെ ബ്രിട്ടിഷ് പൗരന്‍ മുങ്ങിയെന്ന് ആരോഗ്യമന്ത്രി കെ.കെ ശൈലജ. ക്വാറന്റൈന്‍ ചെയ്യാന്‍ ആരോഗ്യ പ്രവര്‍ത്തകര്‍ റിസോര്‍ട്ടില്‍ എത്തിയപ്പോഴാണ് ഇക്കാര്യം അറിഞ്ഞത്.ഇന്നലെ വൈകുന്നേരമാണ് ബ്രിട്ടിഷ് പൗരന് കൊവിഡ് സ്ഥിരീകരിച്ചത്. 

തുടര്‍ന്ന് നടത്തിയ അന്വേഷണത്തില്‍ വിമാനത്താവളത്തില്‍ കയറിയിരുന്ന സംഘത്തെ പിടികൂടുകയായിരുന്നു. ഇയാള്‍ താമസിച്ചിരുന്ന മൂന്നാറിലെ റിസോര്‍ട്ടിലെ ജീവനക്കാരെയും ഐസൊലേഷനിലേക്ക് മാറ്റി. ഒപ്പം ബ്രിട്ടിഷ് സംഘത്തിലുള്ളവരും നിരീക്ഷണത്തിലാണെന്ന് ആരോഗ്യമന്ത്രി പറഞ്ഞു.

റിസോര്‍ട്ട് അധികൃതരുടെ ഭാഗത്ത് നിന്ന് ഗുരുതര വീഴ്ചയുണ്ടായതായും മന്ത്രി വ്യക്തമാക്കി. ക്വാറന്റൈന്‍ ഘട്ടം കഴിഞ്ഞ് ടെസ്റ്റ് നെഗറ്റീവാണെങ്കില്‍ ആരെയും ഇവിടെ പിടിച്ചുവെക്കില്ല. ക്വാറന്റൈനിലുള്ള ആരെയും പുറത്തുവിടാനാവില്ല. റിസോര്‍ട്ട് ഉടമകള്‍ ഇക്കാര്യം പ്രത്യേകം ശ്രദ്ധിക്കണം.അധികൃതരില്‍നിന്ന് അനുമതി ലഭിക്കാതെ ഒരു വിദേശിയെയും പുറത്തേക്ക് വിടാന്‍ പാടില്ലെന്നും മന്ത്രി കൂട്ടിചേര്‍ത്തു.