റിയാദ്: യമനിൽ വിമതർക്കെത്തിയ സഊദിയുടെ നേതൃത്തിലുള്ള അറബ് സഖ്യ സേന നടത്തിയ വ്യോമാക്രമണത്തിൽ ഹൂതി കമാണ്ടറടക്കം നിരവധി പേർ കൊല്ലപ്പെട്ടു. അബ്ദുല്ലാഹ് അബ്ബാസ് ജഹാഫ് ആണ്  കൊല്ലപ്പെട്ട കമാണ്ടറെന്ന് ഗോത്ര മേഖലയിലെ ആളുകളെ ഉദ്ധരിച്ചു മാധ്യമങ്ങൾ റിപ്പോർട്ട് ചെയ്‌തു.

 

വടക്കൻ ഗവർണറെറ്റായ ഹാജ്ജഹ് പ്രവിശ്യയിലെ ഗോത്ര മേഖലകളിലാണ് വ്യോമാക്രമണം നടന്നത്. കഴിഞ്ഞ ഏതാനും ദിവസങ്ങളായി തുടരുന്ന വ്യോമാക്രമണത്തിൽ കഷർ ജില്ലയിലെ ഹൂതികൾ നിലയുറപ്പിച്ച കേന്ദ്രങ്ങളും വ്യോമാക്രമണത്തിൽ തകർത്തിട്ടുണ്ട്. അതേസമയം, അൽ നബീസയിലും പരിസര പ്രദേശങ്ങളിലും ഹൂതികൾ തുടർച്ചയായി ഷെൽ ആക്രമണം നടത്തുന്നതായി റിപ്പോർട്ടുകളുണ്ട്.

 

ഹജ്ജഹ് ഗവർണറേറ്റിലെ ഹജർ ഗോത്ര വിഭാഗങ്ങളുടെ കേന്ദ്രമാണ്. പത്ത് ജില്ലകളിലായി ഇവിടെ രണ്ടു ലക്ഷം ഹജർ ഗോത്ര വർഗ്ഗക്കാരുണ്ടെന്നാണ് കണക്കുകൾ. ഹൂതികൾ തുർച്ചയായി ഷെൽ ആക്രമണം നടത്തുന്നതിനെ തുടർന്ന് ഹജർ ഗോത്ര വിഭാഗങ്ങൾ കഴിഞ്ഞായാഴ്ച്ച സഖ്യ സേനയുടെ സഹായം തേടിയിരുന്നു.