റിയാദ്: സഊദിയിൽ കോവിഡ് 19 കേസുകളിൽ കൂടുതൽ പ്രതീക്ഷ. ചികിത്സയില്‍ കഴിയുന്ന 118 കോവിഡ് 19 കൊറോണ വൈറസ് രോഗികളില്‍ മൂന്ന് പേര്‍ കൂടി സുഖം പ്രാപിച്ചതായി ആരോഗ്യ മന്ത്രി ഡോ:തൗഫീഖ് അല്‍ റബീഅ വാര്‍ത്താ സമ്മേളനത്തില്‍ അറിയിച്ചു. ഇതോടെ വൈറസ് ബാധയിൽ നിന്നും മുക്തരായവരുടെ എണ്ണം ആറായി ഉയർന്നു. സഊദി ആരോഗ്യ മന്ത്രി രാജ്യത്തെ ജനങ്ങളോട് പരമാവധി സമയം വീടുകളില്‍ കഴിയാനും മന്ത്രി ആവശ്യപ്പെട്ടു. നേരത്തെ അത്യാസന്ന നിലയിലായിരുന്ന രോഗിയുടെ ആരോഗ്യനില മെച്ചപ്പെട്ടിട്ടുണ്ട്. രോഗം പൂർണമായും ഭേദമായവർ ഒഴികെയുള്ളവർ ഐസൊലേഷനിലാണ്.

       അതേസമയം, വൈറസ് വ്യാപനം തടയുന്നതിന് കൂടുതൽ കാര്യങ്ങൾ നടപ്പിലാക്കാനുള്ള ഒരുക്കത്തിലാണ് അധികൃതർ. സ്വകാര്യ മേഖലയില്‍ അവധി നല്‍കുന്നത് സംബന്ധിച്ച തീരുമാനം ഉടനെടുക്കും. രോഗികള്‍ക്കും ഗര്‍ഭിണികള്‍ക്കും ലീവ് അനുവദിക്കാന്‍ സ്വകാര്യ കമ്പനികളോട് ഇതിനോടകം തന്നെ ആവശ്യപ്പെട്ടിട്ടുണ്ട്. ഗവൺമെന്റ് ഓഫീസുകളിലെയും വകുപ്പുകളിലെയും സ്ഥാപനങ്ങളിലെയും ഉദ്യോഗസ്ഥരും ജീവനക്കാരും തൊഴിൽ സ്ഥലങ്ങളിൽ ഹാജരാകുന്നത് പതിനാറു ദിവസത്തേക്ക് വിലക്കിയതിനു സമാനമായി സ്വകാര്യ മേഖലാ സ്ഥാപനങ്ങൾക്കും അവധി നൽകുമോയെന്ന ചോദ്യത്തിന് മറുപടിയായി ഇതേ കുറിച്ച് ബന്ധപ്പെട്ട തീരുമാനം മന്ത്രാലയം പരിശോധിച്ച് എടുക്കുമെന്നും വ്യക്തമാക്കി.

         രാജ്യത്തെ ബാങ്കുകളും ഇനി മുതൽ രണ്ടാഴ്ചത്തേക്ക് ഓണ്‍ലൈന്‍ സംവിധാനങ്ങളിൽ മാത്രമായിരിക്കും പ്രവർത്തിക്കുക. ഓണ്‍ലൈന്‍ വഴി ബാങ്കില്‍ നിന്നും മറ്റൊരു ബാങ്കിലേക്ക് കാശയക്കുന്നവര്‍ക്ക് ഫീസ് ഈടാക്കരുതെന്ന് കേന്ദ്ര ബാങ്കായ സാമ അറിയിപ്പ് നല്‍കിയിട്ടുണ്ട്.