റിയാദ്: സഊദിയിൽ കോവിഡ് 19 രോഗ ബാധിതരുടെ എണ്ണം 133 ആയി ഉയർന്നു. തിങ്കളാഴ്ച രാത്രി 15 പേർക്ക് കൂടി രോഗം സ്ഥിരീകരിച്ചതോടെയാണിത്. ഏറ്റവും അവസാനം രോഗബാധ സ്ഥിരീകരിച്ചവരിൽ 13 പേരും സഊദി പൗരന്മാരാണ്. രണ്ടു പേർ വിദേശികളുമാണ്. ജിദ്ദ, റിയാദ് എന്നിവിടങ്ങളിലാണ് വിദേശികൾക്ക് വൈറസ് ബാധ കണ്ടെത്തിയത്. കൂടാതെ, മക്ക, കിഴക്കൻ പ്രവിശ്യ, ജിസാൻ എന്നിവിടങ്ങളിലും തിങ്കളാഴ്ച  വൈറസ് ബാധ സ്ഥിരീകരിച്ചു. 

     ജിദ്ദയിൽ അഞ്ചു പേർക്കാണ് തിങ്കളാഴ്ച വൈറസ് ബാധ കണ്ടെത്തിയത്. ഇവരിൽ നാല് പേരും സഊദി പൗരന്മാരാണ് ഒരാൾ അഫാഗിൻസ്ഥാൻ പൗരനുമാണ്. തലസ്ഥാന നഗരിയായ റിയാദിൽ നാല് കേസുകളും  സ്വദേശികളിലാണ് കണ്ടെത്തിയത്. ഇവർ എല്ലാവരും വിദേശ യാത്ര കഴിഞ്ഞെത്തിയവരാണ്. മക്കയില്‍ സ്ഥിരീകരിച്ച രണ്ട് കേസുകളില്‍ ഒരാള്‍ ഈജിപ്ഷ്യൻ പൗരനും മറ്റൊരാൾ തുര്‍ക്കിയില്‍ നിന്നെത്തിയ സ്വദേശിയുമാണ്. കിഴക്കന്‍ പ്രവിശ്യയിലെ ഖത്വീഫിലും ദഹ്റാനിലും പടിഞ്ഞാറൻ മേഖലയിലെ ജിസാനിലും ഓരോ കേസുകളുമാണ് സ്ഥിരീകരിച്ചത്. അതേസമയം, സഊദിയിൽ ആകെ സ്ഥിരീകരിച്ച 133 കേസുകളില്‍ 73 പേർ സ്വദേശികളും 60 വിദേശികളുമാണ്. വിദേശികളിൽ 49 പേർ ഈജിപ്ത് പൗരന്മാരാണ്. കൂടാതെ, രണ്ട് അമേരിക്കൻ പൗരന്മാരും രണ്ട് ബഹ്റൈന്‍ സ്വദേശികളും ഫിലിപ്പീൻസ്,  ഇന്തോനേഷ്യ, ബംഗ്ലാദേശ്, സ്പെയിൻ,  ഫ്രാൻസ്, ലബനോന്‍, അഫ്ഗാനിസ്ഥാൻ എന്നീ രാജ്യങ്ങളിൽ നിന്നുള്ള ഓരോരുത്തർക്കുമാണ് എന്നിങ്ങനെയാണ് വൈറസ് ബാധ സ്ഥിരീകരിച്ചത്.

       അതിനിടെ, ഇന്ന് മൂന്ന് പേർ കൂടി അസുഖത്തിൽ നിന്നും മോചിതരായതായും സഊദി ആരോഗ്യ മന്ത്രാലയം അറിയിച്ചു. ഇതോടെ, സഊദിയിൽ രോഗം ഭേദപ്പെട്ടവരുടെ എണ്ണം ആറായി ഉയർന്നിട്ടുണ്ട്. വൈറസ് ബാധ വ്യാപനം തടയുന്നതിന്റെ ഭാഗമായി രാജ്യത്തെ ജനങ്ങളോട് പരമാവധി സമയം വീടുകളില്‍ കഴിയാൻ ആരോഗ്യ മന്ത്രി ഡോ: തൗഫീഖ് അല്‍ റബീഅ വാര്‍ത്താ സമ്മേളനത്തില്‍ ആവശ്യപ്പെട്ടിട്ടുണ്ട്.