മലപ്പുറം: കരിപ്പൂര്‍ വിമാനത്താവള വികസനത്തിനായി ഭൂമി ഏറ്റെടുക്കുന്നതിനുള്ള സാമൂഹ്യാഘാത പഠനം ഉടന്‍ പൂര്‍ത്തിയാക്കാന്‍ ജില്ലാ കലക്ടര്‍ അമിത് മീണയുടെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനം. പഠന റിപ്പോര്‍ട്ട് ലഭിച്ച ശേഷം നാട്ടുകാരുടെ ഹിയറിങ് നടത്തും. അതിനു ശേഷമേ അന്തിമ തീരുമാനമുണ്ടാകൂ.
വിമാനത്താവള വികസനത്തിനു നിലവിലെ ഭൂമി അപര്യാപ്തമാണ്. 137 ഏക്കര്‍ കൂടി ഏറ്റെടുക്കേണ്ടതുണ്ട്. പള്ളിക്കല്‍ വില്ലേജ് പരിധിയില്‍നിന്നാണ് സ്ഥലം ഏറ്റെടുക്കേണ്ടിവരിക. കൃത്യമായ വിവരശേഖരണം നടത്തുന്നതിനും പ്രദേശവാസികളുടെ പ്രശ്‌നങ്ങള്‍ മനസിലാക്കി പരിഹാരം കാണുന്നതിനും സാമൂഹ്യാഘാത പഠനവുമായി സഹകരിക്കണമെന്നു കലക്ടര്‍ ആവശ്യപ്പെട്ടു
ജനങ്ങളുടെ ആശങ്കയകറ്റി മാന്യമായ നഷ്ടപരിഹാരം നല്‍കിയ ശേഷമേ സ്ഥലം ഏറ്റെടുക്കല്‍ നടപടികള്‍ ആരംഭിക്കാവൂവെന്ന് എം.എല്‍.എമാരായ ടി.വി ഇബ്രാഹീം, പി. അബ്ദുല്‍ ഹമീദ് എന്നിവര്‍ ആവശ്യപ്പെട്ടു. സ്ഥലം നഷ്ടപ്പെടുന്നവരെ പരിഗണിച്ചു മാത്രമേ കൂടുതല്‍ നടപടികള്‍ ഉണ്ടാകൂവെന്ന് കലക്ടര്‍ ഉറപ്പുനല്‍കി.
കലക്ടറേറ്റില്‍ നടന്ന യോഗത്തില്‍ കൊണ്ടോട്ടി നഗരസഭാ ചെയര്‍പേഴ്‌സണ്‍ കെ.സി ഷീബ, എയര്‍പോര്‍ട്ട് ഡയരക്ടര്‍ കെ. ശ്രീനാവാസ റാവു, ഡെപ്യൂട്ടി കലക്ടര്‍മാരായ എം. അബ്ദുല്‍ സലാം, കാവേരിക്കുട്ടി, തഹസില്‍ദാര്‍ പി. രഘുനാഥന്‍, കൊണ്ടോട്ടി നഗരസഭാ കൗണ്‍സിലര്‍ ചുക്കാന്‍ ബിച്ചു, പള്ളിക്കല്‍ ഗ്രാമപഞ്ചായത്ത് അംഗം യു. രാമന്‍കുട്ടി, ജില്ലാ സര്‍വേ സൂപ്രണ്ട് കെ. ദാമോദരന്‍, റവന്യൂ ഉദ്യോഗസ്ഥര്‍, ആക്ഷന്‍ കൗണ്‍സില്‍ ഭാരവാഹികള്‍ എന്നിവര്‍ പങ്കെടുത്തു.