തിരുവനന്തപുരം: കൊവിഡ്- 19 ബാധയുടെ പശ്ചാത്തലത്തില്‍ സംസ്ഥാനത്ത് പുതുതായി ആരംഭിച്ച ജില്ലാതല ഹെല്‍പ് ഡെസ്‌കുകള്‍ക്ക് വിനോദസഞ്ചാരികളുടെ ക്ഷേമത്തിനു വേണ്ടി ടൂറിസം വകുപ്പ് മാര്‍ഗനിര്‍ദേശങ്ങള്‍ പുറപ്പെടുവിച്ചു. കൊവിഡ് പ്രതിരോധ പ്രവര്‍ത്തനങ്ങള്‍ ത്വരിതപ്പെടുത്തുന്നതിന്റെ ഭാഗമായാണ് മാര്‍ഗനിര്‍ദേശങ്ങള്‍ പുറപ്പെടുവിക്കുന്നതെന്ന് മന്ത്രി കടകംപള്ളി സുരേന്ദ്രന്‍ പറഞ്ഞു. 

സഞ്ചാരികളുടെ ക്ഷേമത്തിനായി ആരോഗ്യവകുപ്പ് പുറപ്പെടുവിച്ച മാര്‍ഗനിര്‍ദേശങ്ങള്‍ക്ക് ടൂറിസം വകുപ്പിന്റെ നിര്‍ദേശങ്ങള്‍ സഹായകരമാകുമെന്നും മന്ത്രി പറഞ്ഞു. ജില്ലാതല ഹെല്‍പ് ഡെസ്‌കുകള്‍ 24 മണിക്കൂറും പ്രവര്‍ത്തിക്കണം, വിനോദസഞ്ചാരികള്‍ക്ക് അവശ്യഘട്ടങ്ങളില്‍ അടിസ്ഥാനസൗകര്യം ലഭ്യമാക്കുകയും നിരീക്ഷണകാലത്തെ പ്രശ്‌നങ്ങള്‍ പരിഹരിക്കാന്‍ ശ്രദ്ധിക്കുകയും വേണം, മുന്‍കൂട്ടി താമസസൗകര്യം ബുക്ക് ചെയ്യാത്ത എല്ലാ സഞ്ചാരികള്‍ക്കും ടൂറിസം വകുപ്പിന്റെ മാര്‍ഗനിര്‍ദേശപ്രകാരം ജില്ലാതല ഹെല്‍പ് ഡെസ്‌കുകള്‍ സഹായം നല്‍കണം, സ്വകാര്യമേഖലയില്‍ താമസ സൗകര്യം ലഭ്യമല്ലെങ്കില്‍ കെ.ടി.ഡി.സി ഹോട്ടലില്‍ സൗകര്യം ഏര്‍പ്പെടുത്താനാവശ്യമായ നടപടി സ്വീകരിക്കണം തുടങ്ങിയവ മാര്‍ഗനിര്‍ദേശങ്ങളില്‍ ഉള്‍പ്പെടുന്നു. 

സംസ്ഥാനത്തെത്തുന്ന സഞ്ചാരികള്‍ക്കാവശ്യമായ സഹായം വകുപ്പ് നല്‍കുന്നുണ്ടെന്ന് ടൂറിസം സെക്രട്ടറി റാണി ജോര്‍ജ് പറഞ്ഞു.  ടൂറിസം ഡയരക്ടര്‍ പി. ബാലകിരണാണ് ഹെല്‍പ് ഡെസ്‌കുകള്‍ക്കു മാര്‍ഗനിര്‍ദേശങ്ങള്‍ പുറപ്പെടുവിച്ചത്. ഭക്ഷണം, വെള്ളം, പ്രാദേശിക ഗതാഗത സൗകര്യം, എന്നിവയില്‍ അടിയന്തര സഹായം ആവശ്യമാണെങ്കില്‍ അതെത്തിക്കണം. ഇതിനാവശ്യമായ ചെലവുകള്‍ പിന്നീട് മടക്കിനല്‍കും. രോഗലക്ഷണങ്ങളെത്തുടര്‍ന്ന് നിരീക്ഷണത്തില്‍ കഴിയുന്ന വിദേശ സഞ്ചാരികളുടെ വിസ കാലാവധി അവസാനിക്കുന്ന പക്ഷം ഹെല്‍പ് ഡെസ്‌കുകള്‍ ഇക്കാര്യം അതത് ജില്ലാ കലക്ടര്‍മാരെ അറിയിക്കണം. രോഗലക്ഷണങ്ങളില്ലാത്ത സഞ്ചാരികള്‍ സ്വന്തം രാജ്യത്തേക്കു മടങ്ങാന്‍ ആഗ്രഹിക്കുന്നുണ്ടെങ്കില്‍ അവരെ ആരോഗ്യവകുപ്പിന്റെ വൈദ്യപരിശോധനാ സെല്ലിനു മുമ്പാകെ ഹാജരാകാന്‍ ആവശ്യപ്പെടണം.

ആരോഗ്യവകുപ്പ് പുറത്തിറക്കിയ യാത്രാ മാനദണ്ഡങ്ങള്‍ പ്രചരിപ്പിക്കുകയും കര്‍ശനമായി പാലിക്കപ്പെടുന്നുണ്ടെന്ന് ഉറപ്പാക്കുകയു വേണം. എല്ലാ ദിവസവും വൈകീട്ട് മൂന്നിനു മുമ്പായി എല്ലാ ജില്ലാതല ഹെല്‍പ് ഡെസ്‌കുകളും സംസ്ഥാന ഹെല്‍പ് ഡെസ്‌കുകള്‍ക്ക് ദൈനംദിന റിപ്പോര്‍ട്ട് ഇ മെയില്‍ ചെയ്യണമെന്നും മാര്‍ഗനിര്‍ദേശത്തില്‍ പറയുന്നു. 

സംസ്ഥാന തല ഹെല്‍പ് ഡെസ്‌ക് നമ്പറുകളായ 9995454696, 9447363538 എന്നിവയില്‍ ജില്ലാതല ഹെല്‍പ് ഡെസ്‌കുകള്‍ ബന്ധപ്പെടാം. ടൂറിസം ഇന്‍ഫര്‍മേഷന്‍ ഓഫിസര്‍മാരായ സജീവ് കെ. ആര്‍ (9995454696), രമേഷ് ടി.പി (9447363538) എന്നിവര്‍ മുഖേനയും ടൂറിസം ഡയരക്ടറേറ്റിലെ പ്രധാന ഹെല്‍പ് ഡെസ്‌കില്‍ ബന്ധപ്പെടാവുന്നതാണ്.