രണ്ട്  തരം പരിശോധനകളിലൂടെയാണ് കൊവിഡ് 19 സ്ഥിരീകരിക്കുന്നത്. ഇജീന്‍ പരിശോധനകള്‍ക്കായുള്ള  റിയല്‍ടൈം റിവേഴ്‌സ് ട്രാന്‍സ്‌ക്രിപ്‌റ്റേഴ്‌സ് പി.സി.ആര്‍ എന്ന മോളിക്കുലാര്‍  പരിശോധനയാണ് ആദ്യം. എന്‍.ഐ.വി പൂനെയില്‍ നിന്നു ലഭിക്കുന്ന റീയേജന്റ് കിറ്റുപയോഗിച്ചാണ്  പരിശോധന നടത്തുക. ആദ്യമായി മീഡിയത്തിലെത്തുന്ന സാംപിളുകളില്‍ നിന്ന് ആര്‍.എന്‍.എയെ  വേര്‍തിരിക്കും. ഇതിന് 3 മുതല്‍ 4 മണിക്കൂര്‍ വരെ സമയം വേണം. ഇതിനെ റിയല്‍ ടൈം  പി.സി.ആര്‍ മെഷീനില്‍ വയ്ക്കുന്നു. ഈ മെഷീനിലൂടെ രണ്ട് മണിക്കൂറിനുള്ളില്‍ പരിശോധനാ ഫലം  ലഭിക്കും. കൊവിഡ് ഇല്ലെങ്കില്‍ ഈ പരിശോധനയില്‍ തന്നെ അറിയാനാകും. ഇജീന്‍ കണ്ടെത്താന്‍  കഴിഞ്ഞില്ലെങ്കില്‍ കൊവിഡ് ഇല്ലെന്ന് സ്ഥിരീകരിക്കാം. സങ്കീര്‍ണമായ ഇത്തരത്തിലുള്ള 40ഓളം ഒന്നാംഘട്ട  പരിശോധനകളാണ് ഒരു ലാബില്‍ 24 മണിക്കൂറിനുള്ളില്‍ ചെയ്യാന്‍ കഴിയുക.

 

 

കൊവിഡ്19  സ്ഥിരീകരിക്കുന്നതിനുള്ള പരിശോധനയാണ് രണ്ടാമത്തേത്. ഇജീന്‍ ഉണ്ടെന്ന് കണ്ടെത്തിയാല്‍ പിന്നെ രോഗം  സ്ഥിരീകരിക്കാന്‍ ഒരു പരിശോധന കൂടി നടത്തണം. ആര്‍.ഡി.ആര്‍.പി, ഒ.ആര്‍.എഫ്. 1 ബി. ജീനുകള്‍  കണ്ടെത്താനുള്ള പരിശോധനയാണിത്. ഇതിനായി വേര്‍തിരിച്ച ആര്‍.എന്‍.എയെ റിയല്‍ ടൈം പി.സി.ആര്‍.  മെഷീനില്‍ വയ്ക്കുന്നു. 3 മണിക്കൂറിനുള്ളില്‍ ഈ ഫലം ലഭിക്കും. ആര്‍.ഡി.ആര്‍.പി, ഒ.ആര്‍.എഫ്. 1  ബി. ജീനുകള്‍ കണ്ടെത്തിയാല്‍ കൊവിഡ് സ്ഥിരീകരിക്കും. തുടര്‍ന്ന് ഈ ഫലം ഔദ്യോഗികമായി  ആരോഗ്യ വകുപ്പിനെ അറിയിക്കും. എന്‍.ഐ.വി ആലപ്പുഴ, കോഴിക്കോട് മെഡിക്കല്‍ കോളജ്,  തിരുവനന്തപുരം മെഡിക്കല്‍ കോളജ് എന്നിവിടങ്ങളില്‍ രണ്ടാംഘട്ട പരിശോധന നടത്താനുള്ള  സംവിധാനങ്ങളുണ്ട്. എന്‍.ഐ.വി പൂനെയുടെ  മാനദണ്ഡങ്ങളും ഗുണനിലവാരവും നിലനിര്‍ത്തുന്ന  തരത്തിലുള്ള സംവിധാനമാണ് എല്ലാ സെന്ററുകളിലും സജ്ജമാക്കിയിരിക്കുന്നത്. അധികം വരുന്ന സാംപിളുകളില്‍ നിന്ന് രോഗപകര്‍ച്ച ഉണ്ടാകാതിരിക്കാന്‍ ഇവ ഹൈപ്പോക്ലോറൈറ്റ് ഉപയോഗിച്ച് നശിപ്പിക്കും.