വടക്കാഞ്ചേരി: തൃശൂര്‍,ഷൊര്‍ണൂര്‍,ഒറ്റപ്പാലം റൂട്ടില്‍ വീണ്ടും സ്വകാര്യ ബസുകളുടെ മിന്നല്‍ പണിമുടക്ക്.  ഷൊര്‍ണൂര്‍ കുളപ്പുള്ളി സ്റ്റാന്‍ഡില്‍ ബസുകള്‍ കയറുന്നതുമായി ബന്ധപ്പെട്ട് അധികൃതരും ബസുടമകളും തമ്മില്‍ ഉടലെടുത്ത തര്‍ക്കത്തെ തുടര്‍ന്ന് കഴിഞ്ഞ മാസം അഞ്ചുദിവസം ബസുടമകള്‍ പണിമുടക്ക് സമരം നടത്തിയിരുന്നു. അന്ന് നടന്ന ചര്‍ച്ചകളില്‍ കുളപ്പുള്ളി സ്റ്റാന്‍ഡില്‍ ബസുകള്‍ കയറ്റാനും പകരം ലിമിറ്റഡ് സ്റ്റോപ്പ് ബസുകള്‍ അംഗീകൃത സ്റ്റോപ്പുകളില്‍ മാത്രം നിര്‍ത്തിയാല്‍ മതിയെന്നും തീരുമാനമെടുത്തിരുന്നു. ഈ ധാരണ അനുസരിച്ചാണ് തുടര്‍ന്ന് സര്‍വിസുകള്‍ നടന്നിരുന്നത്.  എന്നാല്‍ ഇന്നലെ ഉച്ചയ്ക്ക് ഇതിന് വിരുദ്ധമായി കൂനത്തറ 26-ാം മൈല്‍സ് സ്റ്റോപ്പില്‍ വച്ച് നാട്ടുകാര്‍ നിര്‍ത്താതെ പോയ ബസ് തടഞ്ഞതാണ് ബസുടമകളെ പ്രകോപിപ്പിച്ചത്.  ജീവനക്കാര്‍ സര്‍വിസുകള്‍ നിര്‍ത്തിവച്ചതോടെ ജനങ്ങള്‍ പെരുവഴിയിലായി. തുടര്‍ന്ന് അധികൃതരുമായി നടത്തിയ ചര്‍ച്ച യില്‍ മുന്‍ നിലപാടില്‍ നിന്ന് അധികൃതര്‍ പിന്‍വാങ്ങി.
നകുളപ്പുള്ളി സ്റ്റാന്‍ഡില്‍ ബസുകള്‍ കയറണമെന്ന് നിര്‍ബന്ധമില്ലെന്നും ആവശ്യമുള്ള ബസുകള്‍ മാത്രം കയറിയാല്‍ മതിയെന്നും അധികൃതര്‍ അറിയിച്ചു. ഇതോടെയാണ് സമരം പിന്‍വലിച്ചത്.