പൂച്ചാക്കല്‍: പാണാവള്ളിയില്‍ പ്രവര്‍ത്തന രഹിതമായ സൊസൈറ്റി കെട്ടിടത്തില്‍ സാമൂഹ്യ വിരുദ്ധരുടെ ശല്യം രൂക്ഷം. വാഴത്തറ വെളി പനീറ്റിക്കല്‍ റോഡിന് സമീപമുള്ള കയര്‍ സൊസൈറ്റി കെട്ടിടത്തിലും പരിസരത്തുമാണ് രാവും പകലും മദ്യ, മയക്കുമരുന്ന് വില്‍പനയും ഉപയോഗവും നടക്കുന്നത്. വിവിധ സ്ഥലങ്ങളില്‍ നിന്നും രാത്രി കാലങ്ങളില്‍ വാഹനങ്ങളിലെത്തിയാണ് സാമൂഹ്യ വിരുദ്ധര്‍ ഇവിടെ വിലസുന്നത്. ഇതു മൂലം വഴിയാത്രക്കാര്‍ക്കും സമീപ പ്രദേശവാസികള്‍ക്കും ഏറെ ബുദ്ധിമുട്ടായിരിക്കുകയാണ്.
പ്രവര്‍ത്തനരഹിതമായ കയര്‍ സൊസൈറ്റി കെട്ടിടം വര്‍ഷങ്ങളായി അടഞ്ഞുകിടക്കുകയാണ്. ഇതിന്റെ വരാന്തയും മറ്റും ഇപ്പോള്‍ സാമൂഹ്യ വിരുദ്ധര്‍ കൈയടക്കിയ സ്ഥിതിയാണ്. ഇവിടെയാണ് മയക്കുമരുന്ന് ഉപയോഗവും മറ്റും നടക്കുന്നതെന്ന് നാട്ടുകാര്‍ പറഞ്ഞു. ഇവിടങ്ങളില്‍ പൊലിസ് പട്രോളിങ് ശക്തമാക്കണമെന്നും കയര്‍ സൊസൈറ്റി കെട്ടിടം പ്രവര്‍ത്തിപ്പിക്കണമെന്നും പ്രശേദവാസികള്‍ ആവശ്യപ്പെട്ടു.