മൂലമറ്റം: കാഞ്ഞാര്‍-കൂവപ്പള്ളി-വാഗമണ്‍ റോഡ് തകര്‍ന്നു കിടക്കുന്നത് ടൂറിസം മേഖലയായ ഇലവീഴാപൂഞ്ചിറയ്ക്കും വാഗമണിനും തിരിച്ചടിയാകുന്നു. റോഡിന്റെ വീതിയില്ലായ്മയും ഓടകള്‍ നിര്‍മിക്കാത്തതും അറ്റകുറ്റ പണികള്‍ പൂര്‍ത്തിയാക്കാത്തതും ഇതുവഴിയെത്തുന്ന വിനോദ സഞ്ചാരികളെ ഏറെ വലയ്ക്കുന്നു. ഈ റോഡിന്റെ കൂവപ്പള്ളി വരെയുള്ള ഭാഗത്തെ വീതി വര്‍ധിപ്പിക്കുന്നതിനും റോഡ് ടാറിങ് നടത്തുന്നതിനും നടപടി സ്വീകരിക്കണമെന്ന ആവശ്യം ശക്തമാണ്.
1956ല്‍ പൊതുമരാമത്ത് വകുപ്പ് ഏറ്റെടുത്ത കാഞ്ഞാര്‍-കൂവപ്പള്ളി റോഡ് ഇതുവരെയും വീതി കൂട്ടുന്നതിനുള്ള നടപടിയുണ്ടായിട്ടില്ല. മൂന്നര മീറ്റര്‍ വീതിയാണ് ഈ റോഡിനുള്ളത്. ഈ റോഡ് വഴി വാഗമണ്‍, ഇലവീഴാപൂഞ്ചിറ പ്രദേശങ്ങളിലേയ്ക്കായി നൂറുകണക്കിനു വാഹനങ്ങളാണ് പ്രതിദിനം കടന്നുപോകുന്നത്. എന്നാല്‍ റോഡില്‍ രണ്ടു വാഹനങ്ങള്‍ക്ക് ഒരേസമയം സൈഡ് കൊടുക്കാന്‍പോലും വീതിയില്ലാത്ത അവസ്ഥയാണുള്ളത്. വലിയ കയറ്റവും ഇറക്കവും വളവുകളുമുള്ള ഈ റോഡില്‍ പല ഭാഗത്തും ടാറിങും സംരക്ഷണഭിത്തിയുമില്ല. ഇതു അപകടസാധ്യത വര്‍ധിപ്പിക്കുന്നു. ഓടകള്‍ ഇല്ലാത്തതിനാല്‍ റോഡിലൂടെ വെള്ളമൊഴുകി റോഡ് തകര്‍ന്നിരിക്കുകയാണ്. നിരവധി സ്ഥലങ്ങളില്‍ പൈപ്പ് പൊട്ടി വെള്ളം റോഡിലൂടെയാണ് ഒഴുകുകുന്നത്. ഇതുമൂലം റോഡിന്റെ ഇരുവശങ്ങളും വലിയ കുഴിയായി മാറിയിരിക്കുകയാണ്. കാഞ്ഞാര്‍-കൂവപ്പള്ളി, ഇലവീഴാപൂഞ്ചിറ വഴി മേലുകാവില്‍ എത്തിച്ചേരുന്ന റോഡും, പുള്ളിക്കാനം-വാഗമണ്‍-ഏലപ്പാറ റോഡും കാഞ്ഞാര്‍ കൂവപ്പള്ളി വഴിയാണ് കടന്നു പോകുന്നത്.
റോഡ് തകര്‍ന്നതുമൂലം ചെറുവാഹനങ്ങളുടെ അടി തട്ടുകയും ബൈക്ക് യാത്രക്കാര്‍ അപകടത്തില്‍പ്പെടുന്നതും ഇവിടെ പതിവ് കാഴ്ചയാണ്. ഇടുക്കി, കോട്ടയം ജില്ലകളിലെ പ്രമുഖ ടൂറിസ്റ്റു കേന്ദ്രങ്ങളായ ഇലവീഴാപൂഞ്ചിറയിലേയ്ക്കും, വാഗമണിലേക്കും പോകുന്ന ഈ റോഡിന്റെ അറ്റകുറ്റപ്പണികള്‍ എത്രയും വേഗം പൂര്‍ത്തിയാക്കണമെന്നാണ് യാത്രക്കാരുടെ ആവശ്യം. റോഡ് മോശമായതോടെ വിനോദ സഞ്ചാരികളുടെ വരവില്‍ ഗണ്യമായ കുറവ് ഉണ്ടായതായി പറയുന്നു.