കൊല്ലം: കുണ്ടറയില്‍ ക്വാറന്റൈന്‍ ലംഘിച്ച് നാട്ടില്‍ ഇറങ്ങിനടന്ന ഒന്‍പതുപേര്‍ക്കെതിരേ കേസെടുത്തു. ഇവരെ നിരീക്ഷണത്തിലാക്കി. ദുബായില്‍ നിന്നെത്തിയവരാണ് ഇവര്‍. വീടിനുള്ളില്‍ കഴിയണമെന്നാവശ്യപ്പെട്ട ഉദ്യോഗസ്ഥരോട് മോശമായി പെരുമാറിയെന്ന പരാതിയും ഇവര്‍ക്കെതിരേ നിലനില്‍ക്കുന്നുണ്ട്.

കൊവിഡ്-19 മുന്‍കരുതല്‍ നടപടികളുടെ ഭാഗമായി കൊവിഡ് ബാധിത പ്രദേശങ്ങളില്‍ നിന്നെത്തിയവരും രോഗബാധ സംശയിക്കുന്നവരും നിരീക്ഷണത്തില്‍ കഴിയാന്‍ വിസമ്മതിച്ചാല്‍ നിര്‍ബന്ധപൂര്‍വം നടപടി സ്വീകരിക്കാന്‍ സര്‍ക്കാര്‍ ഉദ്യോഗസ്ഥര്‍ക്ക് അനുമതി നല്‍കി ആരോഗ്യവകുപ്പ് വിജ്ഞാപനമിറക്കിയിട്ടുണ്ട്. കൂടാതെ ആവശ്യഘട്ടങ്ങളില്‍ പൊലിസിന്റെ സഹായവും സ്വീകരിക്കാവുന്നതാണ്.

കൂടാതെ ആശുപത്രികളില്‍ അടിയന്തര ശസ്ത്രക്രിയകള്‍ ഒഴികെയുള്ളവ മാറ്റിവയ്ക്കാനും സര്‍ക്കാര്‍ നിര്‍ദേശം നല്‍കിയിട്ടുണ്ട്.ആളുകള്‍ ആശുപത്രിയില്‍ എത്തുന്നത് കുറയ്ക്കാനുള്ള നടപടിയുടെ ഭാഗമായാണ് നിയന്ത്രണം ഏര്‍പ്പെടുത്തിയത്.

സംസ്ഥാനത്ത് കൊവിഡ്-19 ബാധിതരുടെ എണ്ണം 52 ആയി. 53,013 പേരാണ് നിരീക്ഷണത്തില്‍ കഴിയുന്നത് ഇതോടെ സംസ്ഥാന അതീവ ജാഗ്രതയിലാണ്.