മലപ്പുറം: കേരളാ മാപ്പിളകലാ അക്കാദമിയുടെ 19-ാം വാര്‍ഷികാഘോഷത്തിന്റെ ഭാഗമായി മാപ്പിളകലാ സാഹിത്യ രംഗത്തെ അഞ്ചു പ്രതിഭകള്‍ക്കുള്ള അവാര്‍ഡുകള്‍ പ്രഖ്യാപിച്ചു. ഉമ്പായി, ബാലഭാസ്‌കര്‍, എടരിക്കോട് ആലിക്കുട്ടി ഗുരുക്കള്‍, ഹമീദ് ശര്‍വാനി, വടകര കൃഷ്ണദാസ് എന്നിവരുടെ നാമധേയത്തില്‍ ഏര്‍പ്പെടുത്തിയ അവാര്‍ഡുകള്‍ക്കായി യഥാക്രമം കണ്ണൂര്‍ ശരീഫ്, ശിവദാസ് വാര്യര്‍, ഡോ. മുഹമ്മദ് സലീം എടരിക്കോട്, നാസര്‍ മേച്ചീരി, ഖമറുദ്ദീന്‍ കീച്ചേരി എന്നിവരെയാണ് തെരഞ്ഞെടുത്തത്.
കാനേഷ് പൂനൂര്‍,ഫൈസല്‍ എളേറ്റില്‍, പ്രൊഫ. എ.പി സുബൈര്‍ എന്നിവരടങ്ങിയ ജൂറിയണ് അവാര്‍ഡ് ജേതാക്കളെ തെരഞ്ഞെടുത്തത്. ഒന്‍പതിനു മലപ്പുറം പുളിക്കല്‍ നോവല്‍ ഇന്റര്‍നാഷനല്‍ സ്‌കൂളില്‍ നടക്കുന്ന വാര്‍ഷികാഘോഷ പരിപാടിയില്‍ ശിലാഫലകവും പ്രശസ്തിപത്രവും പൊന്നാടയും ഉള്‍പ്പെടുന്ന പുരസ്‌കാരങ്ങള്‍ വിതരണം ചെയ്യും.
ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്യും. പ്രതിനിധി സമ്മേളനം, മാപ്പിള സാഹിത്യ സെമിനാര്‍, സാംസ്‌കാരിക സമ്മേളനം, ഇശല്‍ പെരുമ തുടങ്ങിയ പരിപാടികള്‍ നടക്കും. അവാര്‍ഡ് വിതരണം പാണക്കാട് സയ്യിദ് മുനവ്വറലി ശിഹാബ് തങ്ങള്‍ നിര്‍വഹിക്കും. ബിനോയ് വിശ്വം എം.പി, ടി.വി ഇബ്രാഹീം എം.എല്‍.എ, എപി അനില്‍കുമാര്‍ എം.എല്‍.എ, പി. അബ്ദുല്‍ഹമീദ് എം.എല്‍.എ, റസാഖ് പയമ്പറോഡ് തുടങ്ങിയവര്‍ സംബന്ധിക്കും. വാര്‍ത്താസമ്മേളനത്തില്‍ പി.എച്ച് അബ്ദുല്ല മാസ്റ്റര്‍, ആരിഫ് കാപ്പില്‍, ചാലോടന്‍ രാജീവന്‍, എ.കെ മുസ്തഫ തിരൂരങ്ങാടി, പി.വി ഹസീബ് എന്നിവര്‍ സംബന്ധിച്ചു.