കോട്ടക്കല്‍: ബസ് സ്റ്റാന്‍ഡിലെ പൊലിസ് എയിഡ് പോസ്റ്റ് പ്രവര്‍ത്തനരഹിതമായി. വര്‍ഷങ്ങള്‍ക്കു മുന്‍പ് വലിയ കരഘോഷങ്ങളോടെ ഉദ്ഘാടനം ചെയ്യപ്പെട്ട പൊലിസ് എയ്ഡു പോസ്റ്റ് ഇപ്പോള്‍ പൊടി പിടിച്ചു അടഞ്ഞു കിടക്കുകയാണ്. ഇതിനോടൊപ്പം തന്നെ പാസഞ്ചര്‍ ലോഞ്ചിങ്ങിനു ഒരറ്റത്തു കുട്ടികള്‍ക്കു മുലയൂട്ടുന്നതിനുള്ള സൗകര്യവും ഒരുക്കിയിരുന്നു. ഇതും ഉപയോഗശൂന്യമായി കിടക്കുകയാണ്.
സ്റ്റേഷനില്‍ ആവശ്യത്തിനു പൊലിസില്ലാത്തതും മറ്റുമാണ് എയിഡ് പോസ്റ്റ് നിര്‍ജീവമാകാന്‍ കാരണമായി പറയുന്നത്. പുതുപറമ്പില്‍ പുതിയ പൊലിസ് ഔട്ടുപോസ്റ്റ് ഉടന്‍ നിലവില്‍ വരുമെന്നു പറഞ്ഞിരുന്നെങ്കിലും സേനാംഗങ്ങളുടെ കുറവു മൂലമാണ് പ്രവര്‍ത്തനം തുടങ്ങുവാന്‍ വൈകുന്നതെന്നും കാരണമായി പറയുന്നത്. പൊലിസ്‌സ്റ്റേഷനുകളില്‍ ആവശ്യമായ സേനാംഗങ്ങളെ നിയമിക്കാത്തതും ചില സ്റ്റേഷനുകളുടെ അധികാര പരിധി വലുതായതും സ്റ്റേഷനുകളില്‍ വലിയ പ്രയാസങ്ങളാണ് സൃഷ്ടിക്കുന്നത്.