കൊല്ലങ്കോട്: കാറില്‍ കടത്തുകയായിരുന്ന ഏഴ് കിലോ കഞ്ചാവും 760 ലഹരി ഗുളികകളുമായി രണ്ടുപേര്‍ അറസ്റ്റിലായി. രണ്ടുപേര്‍ ഓടിരക്ഷപ്പെട്ടു. തൃശ്ശൂര്‍ ചാവക്കാട് സ്വദേശികളായ ഷിറാസ് (30), കണ്ണന്‍ (30) എന്നിവരാണ് കഞ്ചാവും ലഹരി ഗുളികകളുമായി എക്‌സൈസ് സംഘത്തിന്റെ പിടിയിലായത്.
രചിക്കണാംപാറയ്ക്കടുത്തെ പെട്രോള്‍ പമ്പിന് മുന്‍വശത്ത് ഇവര്‍ സഞ്ചരിച്ചിരുന്ന കാര്‍ എക്‌സൈസ് ഉദ്യോഗസ്ഥര്‍ തടഞ്ഞെങ്കിലും നിര്‍ത്താതെ പോയി. തുടര്‍ന്ന് കൊല്ലങ്കോട് ടൗണില്‍ വാഹനം കുറുകെയിട്ട് ഇവരെ പിടിക്കാന്‍ ശ്രമിച്ചെങ്കിലും കൂട്ടത്തിലുണ്ടായിരുന്ന രണ്ടുപേര്‍ ഓടിരക്ഷപ്പെട്ടു.
നാട്ടുകാരുടെ സഹായത്തിലാണ് ശേഷിക്കുന്നവരെ പിടികൂടിയത്. ഇവര്‍ നേരത്തെയും കഞ്ചാവ് കടത്തിയിരുന്നതായാണ് സൂചന. എക്‌സൈസ് സംഘം വാഹനം നിര്‍ത്താതെ പോകുന്നതിനിടെ കഞ്ചാവ് കടത്തുകാരുടെ കാര്‍ തട്ടി എക്‌സൈസ് ജീപ്പിനും ഒരു ബൈക്കിനും കേടുപാട് സംഭവിച്ചിട്ടുണ്ട്.
കടത്തുകാര്‍ സഞ്ചരിച്ചിരുന്ന കാറിന്റെ മുന്‍വശത്തെ ബോണറ്റിനകത്താണ് വിവിധ പാക്കുകളിലാക്കി കഞ്ചാവ് സൂക്ഷിച്ചിരുന്നത്. തമിഴ്‌നാട്ടിലെ ഏര്‍വാടിയില്‍നിന്നും 70,000 രൂപ കൊടുത്ത് വാങ്ങിയ കഞ്ചാവും ഗുളികകളും തൃശ്ശൂര്‍ ജില്ലയില്‍ സ്‌കൂള്‍ കോളജുകള്‍ കേന്ദ്രീകരിച്ചുള്ള ചില്ലറ വില്‍പനയ്ക്കായി കൊണ്ടുപോവുകയായിരുന്നുവെന്ന് ഇവര്‍ മൊഴി നല്‍കിയിട്ടുണ്ട്. ഇവര്‍ക്കൊപ്പമുണ്ടായിരുന്ന രണ്ടുപേരെ കുറിച്ച് എക്‌സൈസ് സംഘത്തിന് വ്യക്തമായ സൂചന ലഭിച്ചിട്ടുണ്ട്. അന്വേഷണം ഊര്‍ജിതമാക്കി.