ചേവായൂര്‍: ആശുപത്രിയിലെ വാര്‍ഡില്‍ നിന്ന് ആദിവാസി യുവതിയുമായി മുങ്ങിയ യുവാവിനെ മെഡിക്കല്‍ കോളജ് പൊലിസ് അറസ്റ്റ് ചെയ്തു.
മകളെ വെള്ളിയാഴ്ച ഉച്ചമുതല്‍ കാണാനില്ലെന്ന് കാണിച്ച് അച്ഛന്‍ മെഡിക്കല്‍ കോളജ് പൊലിസില്‍ പരാതി നല്‍കിയിരുന്നു. ആശുപത്രിയിലെ ഏഴാം വാര്‍ഡില്‍ ചികിത്സയില്‍ കഴിയുന്ന അമ്മയുടെ അച്ഛനെ പരിചരിക്കാനെത്തിയ പെണ്‍കുട്ടിയെയും എട്ടാം വാര്‍ഡില്‍ ബന്ധുവിനെ പരിചരിക്കാനെത്തിയ കല്ലായി സ്വദേശിയായ യുവാവിനെയുമാണ് കഴിഞ്ഞദിവസം കാണാതായത്.
പരാതിയെ തുടര്‍ന്ന് അന്വേഷണം നടത്തവേ അര്‍ധരാത്രി രണ്ടോടെ മെഡിക്കല്‍ കോളജ് പ്രിസിപ്പല്‍ ഓഫിസിനു സമീപം വച്ച് പൊലിസ് ഇരുവരെയും പിടികൂടുകയായിരുന്നു. യുവാവിനെതിരേ പൊലിസ് കേസെടുത്തു. പെണ്‍കുട്ടിയെ വൈദ്യപരിശോധനക്കയച്ചു. പെണ്‍കുട്ടിക്ക് പ്രായപൂര്‍ത്തിയായിട്ടില്ലെന്ന് ബന്ധുക്കള്‍ പറയുന്നു.
എന്നാല്‍ 18 വയസ് പൂതിയായിട്ടുണ്ടെന്നും തങ്ങള്‍ തമ്മില്‍ സ്‌നേഹത്തിലാണെന്നും വിവാഹം ചെയ്യാനുള്ള ഒരുക്കത്തിലാണെന്നും യുവതി പൊലിസില്‍ മൊഴി നല്‍കിയെന്നാണ് സൂചന. ഇവര്‍ നേരത്തെ പരിചയമുണ്ടെന്നും പരസ്പരം ഫോണില്‍ ബന്ധപ്പെടാറുണ്ടെന്നുമാണു പൊലിസ് പറയുന്നത്. യുവാവിനെ ഇന്ന് കോടതിയില്‍ ഹാജരാക്കിയേക്കും.