റിയാദ്: സഊദിയെ ലക്ഷ്യമാക്കി യമനിലെ വിമതര്‍ വീണ്ടും മിസൈല്‍ ആക്രമണം നടത്തി. ഒരേസമയം നാല് മിസൈലുകളാണ് സഊദിക്ക് നേരെ യമനിലെ ഹൂതികള്‍ തൊടുത്തുവിട്ടത്. രാവിലെ പത്തേ നാല്‍പതോടെയാണ് നാല് മിസൈലുകളും സഊദി ലക്ഷ്യമാക്കി ഹൂതികള്‍ വിക്ഷേപിച്ചതെന്നും ആളപായമോ നാശ നഷ്ടങ്ങളോ ഉണ്ടായിട്ടില്ലെന്നും സഖ്യസേനയും സഊദി വ്യോമ സേനയും അറിയിച്ചു.

എന്നാല്‍, മിസൈനിന്റെ അവശിഷ്ടങ്ങള്‍ തെറിച്ച് ഒരാള്‍ മരിച്ചതായി സഊദി വാര്‍ത്താ ചാനലായ അല്‍ ഇഖ്ബാരിയ്യ റിപ്പോര്‍ട്ട് ചെയ്തു. ഇതേ കുറിച്ച് കൂടുതല്‍ വിവരങ്ങള്‍ അധികൃതര്‍ പുറത്തുവിട്ടിട്ടില്ല.

ഇറാന്‍ പിന്തുണയോടെ യമനിലെ വിമത വിഭാഗമായ ഹൂതികള്‍ സഊദിക്ക് നേരെയുള്ള ആക്രമണം തുടരുകയാണ്. നിരവധി തവണ മുന്നറിയിപ്പുകള്‍ നല്‍കിയിട്ടും അവയെല്ലാം അവഗണിച്ചാണ് യമന്‍ ഹൂതികളുടെ ആക്രമണം.

സഊദിക്ക് നേരെ ഉപയോഗിക്കുന്ന ആയുധങ്ങളും മിസൈലുകളും ഇറാന്‍ നിര്‍മ്മിതമാണെന്നും ഇറാന്‍ നല്‍കുന്നതാണെന്നും സഊദിയും സഖ്യ രാജ്യങ്ങളും തെളിവുകള്‍ സഹിതം വ്യക്തമാക്കിയിരുന്നു. തുടര്‍ന്നും ആക്രമണം നടക്കുന്നത് കൂടുതല്‍ പ്രശ്‌നത്തിലേക്ക് മേഖലയെ കൊണ്ടെത്തിക്കാനുള്ള ശ്രമമാണെന്ന് നിരീക്ഷകര്‍ വിലയിരുത്തിയിട്ടുണ്ട്.