ജെയ്പൂര്‍: ഐ.പി.എല്ലില്‍ രാജസ്ഥാന്‍ റോയല്‍സിനെതിരേ സണ്‍റൈസേഴ്‌സിന് വിജയം. 11 റണ്‍സിന്റെ വിജയമാണ് ഹൈദരബാദ് കരസ്ഥമാക്കിയത്. വിജയത്തോടെ പോയിന്റെ പട്ടികയില്‍ 12 പോയിന്റുമായി ഒന്നാമതാണ് സണ്‍റൈസേഴ്‌സ്.

ഇരു ടീമുകളുടെയും നായകന്‍മാര്‍ തിളങ്ങിയ മത്സരത്തില്‍ വിജയം ഹൈദരബാദിനായിരുന്നു. ടോസ് നേടി ബാറ്റിങ് തെരഞ്ഞെടുത്ത ഹൈദരബാദ് നിശ്ചിത 20 ഓവറില്‍ ഏഴു വിക്കറ്റ് നഷ്ടത്തില്‍ 151 റണ്‍സെടുത്തു. മറുപടി ബാറ്റിങ്ങിനിറങ്ങിയ രാജസ്ഥാന്‍ റോയല്‍സിന് ആറു വിക്കറ്റ് നഷ്ടത്തില്‍ 140 റണ്‍സ് നേടാനെ കഴിഞ്ഞുള്ളൂ.

ആദ്യം ബാറ്റ് ചെയ്ത ഹൈദബാദിന് വേണ്ടി ഓപണര്‍ ഹെയ്ല്‍സ് 45 റണ്‍സും നായകന്‍ കെയ്ന്‍ വില്യംസണ്‍ 63 റണ്‍സ് നേടി. അര്‍ധസെഞ്ച്വറി നേടിയ നായകന്‍ കെയ്ന്‍ വില്യംസണും ഹെയില്‍സിന്റെ 92 റണ്‍സിന്റെ കൂട്ടുകെട്ടാണ് ഹൈദരബാദിന് മികച്ച സ്‌കോര്‍ നല്‍കിയത്. ഓപണര്‍ ശിഖര്‍ ധവാന്‍ ആറു റണ്‍സെടുത്ത് പുറത്തായി. ഇവര്‍ക്ക് ശേഷം വന്ന മനീഷ് പാണ്ഡെ 16 റണ്‍സ് നേടി.

151 റണ്‍സ് വിജയലക്ഷ്യവുമായി ഇറങ്ങിയ രാജസ്ഥാനെ നായകന്‍ അജിങ്ക്യരഹാനെ തോളിലേറ്റി മുന്നോട്ട് നയിച്ചെങ്കിലും വിജയം മാത്രം അകന്നുനിന്നു. മലയാളി താരം സഞ്ജു സാംസണ്‍ 40 റണ്‍സുമായി മികച്ച പിന്തുണ നല്‍കി. 65 റണ്‍സ് നേടി പുറത്താകാതെ നിന്ന നായകന്‍ രഹാനെയാണ് രാജസ്ഥാനിന്റെ ടോപ് സ്‌കോറര്‍. സഞ്ജുവിന് ശേഷം റണ്‍സ് കണ്ടെത്താന്‍ മറ്റു ബാറ്റ്‌സ്മാന്‍മാര്‍ക്ക കഴിയാത്തതാണ് രാജസ്ഥാന്റെ തോല്‍വിക്ക് കാരണം.