നെയ്‌വേലി: സന്തോഷ് ട്രോഫിയില്‍ ഫൈനല്‍ കാണാതെ പുറത്താകുമെന്ന കേരളത്തിന്റെ ആശങ്കയ്ക്ക് താല്‍ക്കാലിക വിരാമം. തെലങ്കാനക്കെതിരായ മത്സരത്തില്‍ സര്‍വീസസിനെ പരാജയപ്പെടുത്തിയതിനെ തുടര്‍ന്ന് കേരളത്തിന് കിട്ടിയത് പുതുജീവന്‍. ഒന്നിനെതിരേ രണ്ട് ഗോളിനായിരുന്നു തെലങ്കാനയുടെ വിജയം.

കളി തുടങ്ങിയ ഏഴാം മിനിറ്റില്‍ തന്നെ ഷോണ്‍ വരുണ്‍ കുമാറിലൂടെ തെലങ്കാന മുന്നിലെത്തി. 45ാം മിനിറ്റില്‍ ഷഫീഖ് മുഹമ്മദ് തെലങ്കാനയുടെ രണ്ടാം വെടിയുതിര്‍ത്തു. സര്‍വീസസിന്റെ ആശ്വാസ ഗോള്‍ വന്നത് 89ാം മിനിറ്റില്‍ എ.യു ഹരികൃഷ്ണനിലൂടെയാണ്.

ദക്ഷിണ മേഖലാ യോഗ്യതാ റൗണ്ട് ഗ്രൂപ്പ് ബിയില്‍ നാല് പോയിന്റുള്ള തെലങ്കാനയാണ് മുന്നിലുള്ളത്. മൂന്ന് പോയിന്റുമായി സര്‍വീസസ്
രണ്ടാമതും രണ്ട് പോയിന്റുള്ള കേരളം മൂന്നാമതുമാണ്. അവസാന സ്ഥാനത്തുള്ള പുതുച്ചേരിക്ക് ഒരു പോയിന്റാണുള്ളത്.
ഇനി ശേഷിക്കുന്ന മത്സരങ്ങള്‍ തെലങ്കാനയും പുതുച്ചേരിയും, സര്‍വീസസും കേരളവുമാണ്. ഈ മത്സരഫലങ്ങളെ ആശ്രയിച്ചാകും കേരളത്തിന്റെ ഫൈനല്‍ റൗണ്ട് പ്രവേശം.