ആലപ്പുഴ: സംസ്ഥാനത്ത് സദാചാര ഗുണ്ടായിസം തഴച്ചു വളരുന്നത് പൊലിസിന്റെ തണലിലാണെന്ന് കെ.സി വേണുഗോപാല്‍ എം.പി കുറ്റപ്പെടുത്തി.
ഒരു പരിഷ്‌കൃത സമൂഹത്തിന് ചേരാത്ത തരത്തിലുള്ള കാടത്തമാണ് കഴിഞ്ഞ ദിവസം മറൈന്‍ ഡ്രൈവില്‍ ശിവസേന കാട്ടിയത്.
പെണ്‍കുട്ടികള്‍ അടക്കമുള്ളവരെ ശിവസേനയുടെ പേരിലെത്തിയ ഗുണ്ടകള്‍ അക്രമിക്കുമ്പോള്‍ പൊലിസ് കൈയ്യുംകെട്ടി നോക്കി നിന്നത് സമൂഹത്തില്‍ അരാജകത്വം പ്രോത്സാഹിപ്പിക്കുന്നതിനു തുല്യമാണെന്നും സമാന സംഭവങ്ങള്‍ ആവര്‍ത്തിക്കുന്നതിനുള്ള പ്രോത്സാഹനംകൂടിയാണെന്നും എം.പി പറഞ്ഞു.
സംസ്ഥാനത്ത് പൊലിസ് സമ്പൂര്‍ണ പരാജയമാണെന്ന് ഈ സംഭവത്തിലൂടെ വീണ്ടും തെളിഞ്ഞിരിക്കുകയാണ്.
ഇത്തരം സദാചാര അതിക്രമങ്ങള്‍ നടത്തുന്നതിന് ശിവസേനയും ശ്രീരാമസേനയും പോലെയുള്ള സംഘടനകള്‍ക്കൊപ്പം തന്നെയാണ് സി പി എമ്മിന്റെയും സ്ഥാനം.
യൂണിവേഴ്‌സിറ്റി കോളേജിലടക്കം ഭരണത്തിന്റെ തണലില്‍ എസ് .എഫ്.ഐ അടക്കമുള്ള ഇടതു സംഘടനകള്‍ നടത്തിയ സദാചാര പോലീസിങ്ങാണ് ഇത്തരം ഗുണ്ടായിസത്തിന് സര്‍ക്കാര്‍ അനുകൂലമാണെന്ന ധാരണ പരത്തിയത്.
ദിവസംതോറും നിരവധി സ്ത്രീപീഡന കേസുകളും കൊലപാതകങ്ങളും റിപ്പോര്‍ട്ട് ചെയ്യപ്പെടുന്ന സംസ്ഥാനത്ത് സ്ത്രീ സുരക്ഷയ്ക്ക് സര്‍ക്കാര്‍ ഒരു പ്രാധാന്യവും കല്‍പ്പിക്കുന്നില്ലെന്നും അതേസമയം സ്ത്രീകള്‍ക്കു നേരെയുള്ള ഇത്തരം അതിക്രമങ്ങളെ പോലീസ് മൗനം പാലിച്ച് പിന്തുണയ്ക്കുകയാണെന്നും എം.പി പറഞ്ഞു.
മറൈന്‍ ഡ്രൈവില്‍ പെണ്‍കുട്ടികളെ ആക്രമിച്ചവരെ മുഴുവന്‍ അറസ്റ്റു ചെയ്യണമെന്നും തക്കതായ ശിക്ഷ നല്‍കണമെന്നും എം.പി ആവശ്യപ്പെട്ടു.