തിരൂര്‍: സംശയാസ്പദമായ സാഹചര്യത്തില്‍കണ്ട രണ്ട് യുവാക്കളെ നാട്ടുകാര്‍ പിടികൂടി പൊലിസിലേല്‍പിച്ചു. മോഷണ സംഘമാണെന്ന സംശയത്തെ തുടര്‍ന്നാണു നാട്ടുകാര്‍ പൊലിസിനു കൈമാറിയത്. നൈറ്റ്പട്രോളിങ് ഡ്യൂട്ടിയിലുണ്ടായിരുന്ന സംഘം ചൊവ്വാഴ്ച രാത്രി പന്ത്രണ്ടോടെയാണ് ഇരുവരെയും കസ്റ്റഡിയിലെടുത്തത്.
താനൂര്‍ ഹാര്‍ബര്‍, താനൂര്‍ എടക്കടപ്പുറം സ്വദേശികളാണ് യുവാക്കള്‍. തിരൂര്‍, തനൂര്‍ പൊലിസ് സ്റ്റേഷനുകളിലായി ഇവര്‍ക്ക് നിരവധി കേസുകളുണ്ടെന്ന് പൊലിസ് പറഞ്ഞു. ക്ഷേത്ര ഉത്സവം കഴിഞ്ഞ് മദ്യലഹരിയില്‍ തിരൂര്‍ ഭാഗത്തുനിന്ന് കാല്‍നടയായി മടങ്ങുകയായിരുന്നു യുവാക്കള്‍.
ഇതിനിടെ പെരുവഴിയമ്പലത്തിനു സമീപം ചുറ്റിപറ്റി നില്‍ക്കുന്നതുകണ്ട നാട്ടുകാര്‍ ഇരുവരെയും പിടികൂടി തിരൂര്‍ പൊലിസില്‍ ഏല്‍പിക്കുകയായിരുന്നു.