റിയാദ്: സഊദിയില്‍ ത്വായിഫിനു സമീപം ഉണ്ടായ വാഹനാപകടത്തില്‍ മലപ്പുറം സ്വദേശിയടക്കം രണ്ടു പേര്‍ മരിച്ചു. മറ്റൊരു മലയാളിക്ക് പരുക്കേല്‍ക്കുകയും ചെയ്തിട്ടുണ്ട്. ത്വാഇഫില്‍ നിന്ന് 80 കിലോമീറ്റര്‍ അകലെ തുറബ ബീഷ റോഡിലുണ്ടായ വാഹനാപകടത്തില്‍ മലപ്പുറം കരുവാരകുണ്ട് മഞ്ഞല്‍പ്പാറ സ്വദേശി മാട്ടൂമ്മല്‍ സിദ്ദീഖ് (50) ആണ് മരിച്ചത്. അപകടത്തില്‍ മരിച്ച മറ്റൊരാള്‍ സ്വദേശി പൗരനാണ്. പരുക്കേറ്റ കൊല്ലം സ്വദേശി നജീം (35) തുറബ ജനറല്‍ ആശുപത്രിയില്‍ ചികില്‍സയിലാണ്.

ഇവര്‍ സഞ്ചരിച്ചിരുന്ന പിക്കപ്പും സ്വദേശി ഓടിച്ചിരുന്ന കാറും തമ്മില്‍ കൂട്ടിയിടിച്ചാണ് അപകടം. സ്വദേശി ഓടിച്ചിരുന്ന വാഹനം ദിശമാറി വന്ന് ഞങ്ങളുടെ വാഹനത്തില്‍ ഇടിക്കുകയായിരുവെന്ന് ചികില്‍സയില്‍ കഴിയുന്ന നജീം പറഞ്ഞു. ജിദ്ദയില്‍ താമസിക്കുന്ന ഇവര്‍ ജോലിആവശ്യാര്‍ത്ഥം കഴിഞ്ഞ ദിവസം അല്‍ബഹയില്‍ വന്ന് തിരിച്ച് മഹാനിയിലേക്കുള്ള യാത്രമധ്യേയായിരുന്നു അപകടം.

ഇരുപത് വര്‍ഷത്തിലധികമായി സിദ്ദീഖ് സഊദിയില്‍ ജോലി ചെയ്ത് വരുന്നു. ഭാര്യ: ജസീന. മക്കള്‍: മിര്‍സഷറി, റിന്‍സഷറി. മരുമകന്‍: അബുബക്കര്‍. തുറബ ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം മക്കയിലോ ജിദ്ദയിലോ മറവ് ചെയ്യുമെന്ന് സഹായത്തിന് രംഗത്തുള്ള ജിദ്ദ കരുവാരകുണ്ട് കെ.എം.സി.സി നേതാവ് അലി മഞ്ഞല്‍പ്പാറ പറഞ്ഞു.