വാഷിങ്ടണ്‍: യു.എസില്‍ കൊവിഡ്- 19 ബാധിച്ച് മരിച്ചവരുടെ എണ്ണം 1000 കടന്നു. ഇതിനകം 69000 പേര്‍ക്കാണ് യു.എസില്‍ കൊവിഡ്- 19 സ്ഥിരീകരിച്ചത്.

കൊറോണയെ തുരത്താന്‍ യു.എസ് രണ്ട് ട്രില്യണ്‍ ഡോളറിന്റെ ബില്‍ പാസാക്കിയിട്ടുണ്ട്. ആരോഗ്യപ്രവര്‍ത്തകര്‍, ബിസിനസ് മേഖലയില്‍ ചെലവഴിക്കാനാണ് ഇത്രയും തുക വകയിരുത്തിയത്.

അതേസമയം, കൊറോണയെ നേരിടാന്‍ പാവപ്പെട്ട രാജ്യങ്ങളെ സഹായിക്കുന്നതിനായി രണ്ട് ബില്യണ്‍ ഡോളറിന്റെ സഹായത്തിന് വേണ്ടി അഭ്യര്‍ഥിച്ചിരിക്കുകയാണ് യു.എന്‍ മേധാവി ആന്റണിയോ ഗുട്ടറസ്.

ലോകത്താകമാനം 4,72,000 കൊവിഡ് കേസുകളാണ് റിപ്പോര്‍ട്ട് ചെയ്തത്. 21,000 പേര്‍ ഇതിനകം മരണപ്പെട്ടു. 1,14,000 പേര്‍ക്ക് രോഗം ഭേദമാവുകയും ചെയ്തു.

യു.എസില്‍ ആദ്യഘട്ടത്തില്‍ വലിയ മുന്നൊരുക്കങ്ങള്‍ നടത്താതിരുന്നത് വലിയ പ്രത്യാഘാതമാണ് ഉണ്ടാക്കിയത്. ഇറ്റലി, സ്‌പെയിന്‍ തുടങ്ങിയ വികസിത രാജ്യങ്ങളുടെ പിന്നാലെ അമേരിക്കയിലും കൊറോണ വ്യാപകമായി പടരുകയും നിരവധി പേരുടെ മരണത്തില്‍ കലാശിക്കുകയുമാണ്.