ന്യൂഡല്‍ഹി: അധികാരത്തിലെത്തിയാല്‍ മുത്വലാഖ് വിരുദ്ധ നിയമം പിന്‍വലിക്കുമെന്ന് കോണ്‍ഗ്രസ്. എ.ഐ.സി.സി ന്യൂനപക്ഷ കണ്‍വെന്‍ഷനില്‍ സംസാരിക്കവെ മഹിളാ കോണ്‍ഗ്രസ് പ്രസിഡന്റ് സുഷ്മിത ദേവാണ് ഇക്കാര്യം പറഞ്ഞത്. മുത്വലാഖ് ബില്‍ മുസ്്‌ലിം സ്ത്രീകളെ ശാക്തീകരിക്കാനല്ല മറിച്ച് മുസ്്‌ലിം പുരുഷന്‍മാരെ ദ്രോഹിക്കാനുള്ളതാണെന്നും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ സാക്ഷിയാക്കി നടത്തിയ പ്രസംഗത്തില്‍ സുഷ്മിത ദേവ് പറഞ്ഞു.
മുസ്്‌ലിം പുരുഷന്‍മാരെ അറസ്റ്റ് ചെയ്യാനും ജയിലിലടക്കാനുമുള്ള മോദി സര്‍ക്കാറിന്റെ ആയുധം മാത്രമാണ് ബില്‍. സുഷ്മിത ദേവ് പറഞ്ഞു.
ലോക്‌സഭ പാസാക്കിയ ബില്‍ രാജ്യസഭയില്‍ പാസാകാതെ കിടക്കുകയാണ്. ബില്‍ സെലക്ട് കമ്മിറ്റിക്ക് വിടണമെന്നാണ് പ്രതിപക്ഷത്തിന്റെ ആവശ്യം.
ജനുവരിയില്‍ സര്‍ക്കാര്‍ മുത്വലാഖ് നിരോധിച്ച് ഓര്‍ഡിനന്‍സ് കൊണ്ടുവന്നിരുന്നു. മുത്വലാഖ് ചെയ്യുന്ന പുരുഷന്‍മാര്‍ക്ക് മൂന്ന് വര്‍ഷം ജയില്‍ ശിക്ഷ ഉറപ്പാക്കുന്നതാണ് ബില്‍. അതോടൊപ്പം ഇതിനെ ജാമ്യമില്ലാക്കുറ്റമാക്കുകയും ചെയ്തിട്ടുണ്ട്. ബില്‍ എടുത്തുകളയുമെന്ന കോണ്‍ഗ്രസ് വാഗ്ദാനം ന്യൂനപക്ഷ പ്രീണനമാണെന്ന് ബി.ജെ.പി വക്താവ് സംപീത് പത്ര കുറ്റപ്പെടുത്തി.