കൊച്ചി: നഗരത്തില്‍ കഞ്ചാവെത്തിക്കുന്ന കൊട്ടേഷന്‍ സംഘത്തെ ആയുധങ്ങളുമായി സെന്‍ട്രല്‍ പൊലിസ് അറസ്റ്റ് ചെയ്തു. പാലക്കാട് മണ്ണാര്‍ക്കാട് പോറ്റൂര്‍ വീട്ടില്‍ ഹിലാലുദ്ദീന്‍(23), മണ്ണാര്‍ക്കാട് പിലായിത്തൊടെ വീട്ടില്‍ ഫന്നാന്‍(20), മണ്ണാര്‍ക്കാട് അലനല്ലൂര് പുത്തന്‍പുരയില്‍ ആസിഫ് (23), അലനല്ലൂര്‍ സതീഷ് (32) എന്നിവരെയാണ് സ്റ്റേഷന്‍ ഇന്‍സ്‌പെക്ടര്‍ അനന്തലാലിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.
നഗരത്തില്‍ മറൈന്‍ഡ്രൈവ്, മേനക പോലുള്ള പ്രധാന ഭാഗങ്ങളില്‍ കഞ്ചാവ് എത്തിക്കുന്ന സംഘത്തെയാണ് അറസ്റ്റ് ചെയ്തതെന്ന് പൊലിസ് പറഞ്ഞു. യുവാക്കളും കുട്ടികളും ആണ് ഇവരുടെ പ്രധാന ഇരകള്‍. കഞ്ചാവിന് അടിമയാകുന്ന യുവാക്കളെ ഇവര്‍ കൊട്ടേഷന്‍ ആവശ്യത്തിനായി ഉപയോഗിക്കാറുണ്ട് എന്നും പൊലിസ് സംശയിക്കുന്നു. മറൈന്‍ഡ്രൈവ് ഭാഗങ്ങളില്‍ വ്യാപകമായി കഞ്ചാവ് വില്‍പന നടക്കുന്നുണ്ടെന്ന് പൊലിസിന് നേരത്തേ രഹസ്യവിവരം കിട്ടിയിരുന്നു.
എറണാകുളം അസിസ്റ്റന്റ് കമ്മിഷണറായി ചാര്‍ജെടുത്ത പി.എസ് സുരേഷ്, ഇന്‍സ്‌പെക്ടര്‍ അനന്തലാല്‍ എന്നിവരുടെ നേതൃത്വത്തില്‍ രണ്ടുദിവസമായി പ്രതികള്‍ക്കായി വ്യാപകമായി അന്വേഷണം നടത്തിവരികയായിരുന്നു. തുടര്‍ന്ന് ഇന്നലെ പ്രതികള്‍ കൊച്ചിയില്‍ വരുമെന്ന് പൊലിസിന് വിവരം ലഭിച്ചു. ഇതേതുടര്‍ന്ന് പൊലിസ് ഡെപ്യൂട്ടി കമ്മിഷണര്‍ ഹിമേന്ദ്രനാഥിന്റെ നിര്‍ദേശപ്രകാരം മറൈന്‍ഡ്രൈവ് ഭാഗത്ത് പൊലിസിനെ വിന്യസിച്ചു.
വൈകിട്ട് ആറു മണിക്കുശേഷം മറൈന്‍ഡ്രൈവ് ഭാഗത്തേക്ക് വന്ന പ്രതികളെ പൊലിസ് അറസ്റ്റ് ചെയ്യുകയായിരുന്നു. ഗോശ്രീ ഭാഗത്തുനിന്ന് വരുന്ന വഴി സി.എം.എഫ്.ആര്‍.ഐയുടെ മുന്‍പില്‍ വെച്ചാണ് ഇവരെ അറസ്റ്റ് ചെയ്തത്. അറസ്റ്റ് ചെയ്ത പ്രതികളില്‍നിന്ന് ഒന്നര കിലോയോളം കഞ്ചാവ് രണ്ട് വടിവാളുകള്‍ ഒരു കത്തി എന്നിവ പൊലിസ് കണ്ടെടുത്തു.
പ്രതികളെ കോടതിയില്‍ ഹാജരാക്കിയശേഷം കസ്റ്റഡിയില്‍ വാങ്ങി കൂടുതല്‍ ചോദ്യം ചെയ്യും. സെന്‍ട്രല്‍ പൊലിസ് സ്റ്റേഷന്‍ സബ് ഇന്‍സ്‌പെക്ടര്‍മാരായ ജോസഫ് സാജന്‍, സുനു മോന്‍ എന്നിവരുടെ നേതൃത്വത്തില്‍ എ.എസ്.ഐ ഗോപി, സീനിയര്‍ സിവില്‍ പൊലിസ് ഓഫിസര്‍മാരായ പ്രദീപ്, ഷാജി സിവില്‍ പൊലിസ് ഓഫീസര്‍മാരായ രഞ്ജിത്ത്, ഇസഹാക്ക്, മനോജ് കുമാര്‍, അജിത്ത്, എബി എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്