വാഷിംഗ്ടണ്‍: കൊവിഡ് 19 വൈറസ് ബാധ സ്ഥിരീകരിച്ച രോഗികളുടെ എണ്ണത്തില്‍ ചൈനയെ പിന്തള്ളി അമേരിക്ക. അമേരിക്കയില്‍ രോഗം സ്ഥിരീകരിച്ചവരുടെ എണ്ണം 85,000 കവിഞ്ഞതായാണ് റിപ്പോര്‍ട്ട്. ചൈനയില്‍ 81340 പേര്‍ക്കും ഇറ്റലിയില്‍ 80589 പേര്‍ക്കുമാണ് രോഗം സ്ഥിരീകരിച്ചത്. ലോകത്താകെ 531806 പേര്‍ക്കാണ് രോഗം സ്ഥിരീകരിച്ചിട്ടുള്ളത്.

24073 മരണമാണ് ഇതുവരെയായി ലോകത്ത് കൊവിഡ് ബാധയില്‍ രേഖപ്പെടുത്തിയിട്ടുള്ളത്. ചൈനയില്‍ രോഗം 3292 പേരും ഇറ്റലിയില്‍ 8215 പേരുമാണ് മരിച്ചത്. എന്നാല്‍ യു.എസില്‍ 1,178 പേരാണ് മരിച്ചത്. ലോകത്ത് കൊവിഡ് 19 ബാധിച്ച് മരിച്ചവരുടെ എണ്ണത്തില്‍ മൂന്നിലൊന്ന് മരണവും സംഭവിച്ചത് ഇറ്റലിയിലാണ്.

കൊവിഡ് 19 ന്റെ അടുത്ത ആഘാതം ഏറ്റവും കൂടുതല്‍ അനുഭവിക്കാന്‍ പോകുന്നത് അമേരിക്കയാകുമെന്ന് ലോകാരോഗ്യസംഘടന നേരത്തെ മുന്നറിയിപ്പ് നല്‍കിയിരുന്നു. രാജ്യത്ത് അതിവേഗമാണ് രോഗം വ്യാപിക്കുന്നതെന്നു വക്താവ് മാര്‍ഗരറ്റ് ഹാരിസ് വ്യക്തമാക്കി.