ന്യൂഡല്‍ഹി: റാഫേല്‍ ഇടപാടില്‍ പ്രധാനമന്ത്രിയുടെ ഓഫിസിന്റെ ഇടപെടലില്‍ പേടിക്കേണ്ടതില്ലെന്നും എല്ലാം ശരിയാവുമെന്നും അന്നത്തെ പ്രതിരോധമന്ത്രി മനോഹര്‍ പരീക്കര്‍ കത്തിന് മറുപടി നല്‍കിയിട്ടുണ്ടെന്ന് പ്രതിരോധമന്ത്രി നിര്‍മലാ സീതാരാമന്‍.

കരാറില്‍ പ്രധാനമന്ത്രി ഇടപെട്ടുവെന്ന തെളിവിനെ നിഷേധിക്കാതിരുന്ന നിര്‍മല മാധ്യമധര്‍മത്തിന് നിരക്കാത്ത കാര്യമാണ് പത്രം ചെയ്തിരിക്കുന്നതെന്നും കുറ്റപ്പെടുത്തി. പരീക്കര്‍ പറയുന്ന കാര്യങ്ങള്‍ പത്രം പ്രസിദ്ധീകരിച്ചില്ല. ഇപ്പോള്‍ സംയുക്ത പാര്‍ലമെന്ററി സമിതി അന്വേഷണം ആവശ്യപ്പെടുന്ന നിങ്ങള്‍ കഴിഞ്ഞ സര്‍ക്കാരിന്റെ കാലത്ത് പ്രധാനമന്ത്രിയുടെ ഓഫിസില്‍ സോണിയാഗാന്ധി ഇടപെട്ടതിനെക്കുറിച്ചും അന്വേഷണം ആവശ്യപ്പെടുമോയെന്നും നിര്‍മല ചോദിച്ചു.

കോണ്‍ഗ്രസ് ചത്ത കുതിരയെ ചമ്മട്ടികൊണ്ടടിച്ചു നോക്കുകയാണ്. കരാര്‍ സംബന്ധിച്ച് പ്രധാനമന്ത്രിയുടെ ഓഫിസ് നടത്തുന്ന പീരിയോഡിക്കല്‍ അന്വേഷണത്തെ ഇടപെടലായി കാണരുത്. കോണ്‍ഗ്രസ് സൈന്യത്തെ സര്‍ക്കാരിനെതിരേ തിരിക്കാനാണ് ശ്രമിക്കുന്നത്. ഇത് ദൗര്‍ഭാഗ്യകരവും അപകടകരവുമാണെന്ന് നിര്‍മല പാര്‍ലമെന്റില്‍ പറഞ്ഞു.