കൈറോ: കൊവിഡ് ബാധയുമായി ബന്ധപ്പെട്ട വാര്‍ത്ത റിപ്പോര്‍ട്ട് ചെയ്യുന്ന 'ദി ഗാര്‍ഡിയന്‍' മാധ്യമപ്രവര്‍ത്തകയെ ഈജിപ്ത് പുറത്താക്കി. ഇവര്‍ റിപ്പോര്‍ട്ട് ചെയ്ത കൊവിഡ് ബാധിതരുടെ എണ്ണം ഔദ്യോഗികമായി പുറത്തു വിട്ടതിനേക്കാള്‍ കൂടുതലായതാണ് നടപടിക്കു കാരണം.

'ദി ഗാര്‍ഡിയന്‍' പത്രത്തിന്റെ റിപ്പോര്‍ട്ടര്‍ റൂത് മിഷേല്‍സണിനോട് രാജ്യം വിട്ടുപോകാന്‍ ആവശ്യപ്പെടുകയായിരുന്നു. രാജ്യത്തെ കൊറോണ കേസുകള്‍ അധികൃതര്‍ ഔദ്യോഗികമായി പുറത്തുവിട്ടതിനേക്കാള്‍ കൂടുതലാണെന്ന് റൂത് തന്റെ റിപ്പോര്‍ട്ടില്‍ പരാമര്‍ശിച്ചിരുന്നു.

ജര്‍മന്‍ പൗരയായ റൂത് 2014 മുതല്‍ ഈജിപ്തില്‍ മാധ്യമപ്രവര്‍ത്തകയായി ജോലി ചെയ്യുന്നുണ്ട്. മാര്‍ച്ച് 15ന് മിഷേല്‍സണ്‍ എഴുതിയ ലേഖനത്തിലാണ് മാര്‍ച്ച് ആദ്യവാരത്തില്‍ ഈജിപ്തില്‍ കൊവിഡ് കേസുകള്‍ 6,000നും 19,300നും ഇടയിലാണെന്നും റിപ്പോര്‍ട്ട് ചെയ്ത്. എന്നാല്‍ ഈ സമയത്ത് ഈജിപ്ത് ഔദ്യോഗികമായി രാജ്യത്ത് ആകെ മൂന്ന് കേസുകള്‍ മാത്രമാണ് റിപ്പോര്‍ട്ട് ചെയ്തിരുന്നത്.