കട്ടപ്പന: നെടുങ്കണ്ടം താലൂക്ക് ആശുപത്രിയില്‍ സഹോദരിയെ കാണാനെത്തിയ യുവാവിനെ തെരുവുനായ കടിച്ചുകീറി.
ഇന്നലെ ഉച്ചയോടെയാണ് സംഭവം. താലൂക്ക് ആശുപത്രിയില്‍ ചികിത്സയില്‍ കഴിയുന്ന സഹോദരിയെ കാണാനെത്തിയ ബാലഗ്രാം നെല്ലിക്കാപ്പള്ളിയില്‍ ശരത്തി(24)നെയാണ് തെരുവുനായ ആക്രമിച്ചത്. ഇയാളുടെ ദേഹത്തേക്ക് ചാടിവീണ് നായ ആക്രമിക്കുകയായിരുന്നു.
കാലുകളുടെ പലഭാഗത്തും ഉള്ളംകാലിലും കടിയേറ്റു ഗുരുതരമായി മുറിവേറ്റിട്ടുണ്ട്. ആഴത്തിലുള്ള മുറിവാണ്. ആശുപത്രി പരിസരത്ത് ദിവസവും ആളുകള്‍ക്ക് തെരുവുനായ്ക്കളുടെ ആക്രമണം ഉണ്ടാകാറുണ്ടെന്ന് പ്രദേശവാസികള്‍ പറഞ്ഞു. കാടുപിടിച്ച് കിടക്കുന്ന സര്‍ക്കാര്‍ ഭൂമിയാണ് നായ്ക്കളുടെ വിഹാരകേന്ദ്രം. ഇവിടെ പെറ്റുപെരുകുന്ന ഇവ ടൗണിലും പരിസര പ്രദേശങ്ങളിലുമായി അലഞ്ഞുതിരിഞ്ഞു നടക്കുകയാണ്.
പ്രധാനമായും ആശുപത്രി പരിസരം, ബ്ലോക്ക് പഞ്ചായത്ത് റോഡ്, കരുണ ആശുപത്രി റോഡ് എന്നിവിടങ്ങളിലാണ് ഇവയുടെ ശല്യം കൂടുതലായുള്ളത്. സ്ത്രീകളെയും കുട്ടികളെയും ഓടിച്ചിട്ട് ആക്രമിക്കുന്നതും പതിവാണ്.