അബുജ: നൈജീരിയയില്‍ ഇരട്ട ചാവേറാക്രമണത്തില്‍ 24 പേര്‍ കൊല്ലപ്പെട്ടു. വടക്കുകിഴക്കന്‍ നൈജീരിയന്‍ പട്ടണമായ മുബിയിലെ പള്ളിയിലും മാര്‍ക്കറ്റിലുമാണ് സ്‌ഫോടനമുണ്ടായത്. നിരവധി പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്.

പള്ളിയില്‍ പ്രാദേശിക സമയം ഉച്ചയ്ക്ക് ഒരു മണിക്കാണ് ചാവേര്‍ പൊട്ടിത്തെറിച്ചത്. ഇവിടുന്ന് പിന്തിരിഞ്ഞോടുന്നതിനിടെ രണ്ടാമത്തെ ചാവേര്‍ 200 മീറ്റര്‍ ദൂരത്ത് മാര്‍ക്കറ്റില്‍ പൊട്ടിത്തെറിക്കുകയായിരുന്നു.

സ്‌ഫോടനത്തില്‍ പള്ളിയുടെ മേല്‍ക്കൂര തകര്‍ന്നിട്ടുണ്ട്. നിസ്‌കാരത്തിന് ഇടയിലായിരുന്നു സ്‌ഫോടനം.

സ്‌ഫോടനത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. എന്നാല്‍ 2009 മുതല്‍ നൈജീരിയയില്‍ തുടരെത്തുടരെന്ന് സ്‌ഫോടനം നടത്തുന്ന ബോക്കോ ഹറമാണ് പിന്നിലെന്നാണ് സംശയിക്കുന്നത്.

ഇവരുടെ ആക്രമണത്തില്‍ 20,000 അധികം പേരാണ് നൈജീരിയയില്‍ കൊല്ലപ്പെട്ടത്. 20 ലക്ഷം പേര്‍ക്ക് വീടു വിട്ടോടേണ്ടിയും വന്നു.