കോഴിക്കോട്: കൊച്ചി മറൈന്‍ ഡ്രൈവ് പാര്‍ക്കില്‍ എത്തിയവര്‍ക്ക് നേരെ ശിവസേന നടത്തിയ സദാചാര ഗുണ്ടായിസത്തിനെതിരെ കോഴിക്കോട് സൗഹൃദക്കൂട്ടത്തിന്റെ നേതൃത്വത്തില്‍ 'വാ നമുക്ക് മാനാഞ്ചിറയിലിരിക്കാം'പ്രതിഷേധ സംഗമം നടത്തി. ഫാസിസത്തിനെതിരെ പാട്ടു പാടിയും ചൂരല്‍ കൊണ്ട് പ്രതീകാത്മകമായി തല്ലിയും പ്രതിഷേധിച്ചു.
പ്രതിഷേധ സംഗമം സാഹിത്യകാരന്‍ കല്‍പറ്റ നാരായണന്‍ ഉദ്ഘാടനം ചെയ്തു. ഫാസിസത്തിനെതിരെ ഫാസിസാതീത മൂല്യങ്ങള്‍ കൊണ്ടും സൗഹൃദങ്ങള്‍ കൊണ്ടും എതിര്‍ക്കണമെന്ന് അദ്ദേഹം അഭിപ്രായപ്പെട്ടു.
ചടങ്ങില്‍ ഗുരുവായൂരപ്പന്‍ കോളജ് സാമ്പത്തിക ശാസ്ത്ര വിഭാഗം മേധാവി മല്ലിക ടീച്ചര്‍, എന്‍.വി ബാലകൃഷ്ണന്‍, പസ്‌കി, ശ്രീജിത്ത് കാഞ്ഞിലശ്ശേരി, പ്രത്യുശ് ചന്ദ്രന്‍, ബിബിന്‍ ദാസ് പരപ്പനങ്ങാടി, വിഷ്ണു, അക്ഷയ് കക്കോടി, ഏണസ്‌റ്റോ എന്നിവര്‍ പങ്കെടുത്തു.