അഞ്ചല്‍: ചിന്നക്കടയിലെ റെയില്‍വേ പുറമ്പോക്കില്‍ നിന്നും മരപ്പട്ടിയെ പിടിച്ച ഒരാളെ കൊല്ലം കണ്‍ട്രോള്‍ പൊലിസ് പിടികൂടി വനപാലകരെ ഏല്‍പിച്ചു. കൊല്ലം തെക്കേവിളയില്‍ രാഗസുധയില്‍ വിനേഷ് ഭരതന്‍ (33) ആണ് പിടിയിലായത്. കഴിഞ്ഞ ദിവസം പകല്‍ പന്ത്രണ്ടരയോടെയാണ് സംഭവം. റെയില്‍വേ പുറമ്പോക്കില്‍ സാധാരണയായി കണ്ടുവരാറുള്ളതാണ് മരപ്പട്ടികള്‍. വംശനാശ ഭീഷണി നേരിടുന്ന മരപ്പട്ടിയെ പിടികൂടിയതിന് വന്യ ജീവി സംരക്ഷരണ നിയമമനുസരിച്ചുള്ള വകുപ്പ് ഷെഡ്യൂള്‍ 2 പ്രകാരമാണ് അറസ്റ്റ് ചെയ്തത്. രണ്ട് വയസ് പ്രായമുള്ളതായ ആണ്‍ വര്‍ഗത്തില്‍പ്പെട്ടതാണ് മരപ്പട്ടി. പ്രതിയെ വൈകിട്ടോടെ അഞ്ചല്‍ വനം റേഞ്ച് ഓഫിസര്‍ ബി.ആര്‍ ജയന്റെ നേതൃത്വത്തിലുള്ള വനപാലക സംഘം ഏറ്റുവാങ്ങി. പുനലൂര്‍ കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.