തൊടുപുഴ:  എന്‍ജിനീയറിങ് എന്‍ട്രന്‍സില്‍ നാലാം റാങ്ക് മുതലക്കോടത്തെക്കുകൊണ്ടുവന്ന സന്തോഷത്തിലാണ് ഇവിടത്തുകാര്‍.
എന്‍ട്രന്‍സ് പരീക്ഷയില്‍ കലയന്താനി കല്ലുംപുറത്ത് അന്‍ഷാദ് സുബൈറാണ് നാലാം റാങ്ക് നേടിയത്. എസ്.എസ്.എല്‍.സി പരീക്ഷയില്‍ എല്ലാ വിഷയങ്ങള്‍ക്കും എപ്ലസ് നേടിയ അന്‍ഷാദ്  കഴിഞ്ഞ പ്ലസ് ടു പരീക്ഷയില്‍  മുഴുവന്‍ മാര്‍ക്കും കരസ്ഥമാക്കിയിരുന്നു. മുതലക്കോടം സെന്റ് ജോര്‍ജ് എച്ച്.എസ്.എസിലാണ് പഠിച്ചത്. ചിത്ര രചനയില്‍ താല്‍പര്യമുള്ള അന്‍ഷാദിന് ആര്‍ക്കിടെക്ചര്‍ എന്‍ജിനീയര്‍ ആകാനാണ് മോഹം. കളമശേരി ജയ്ഹിന്ദ് കോച്ചിങ് സെന്ററില്‍ ഒരുമാസത്തെ പരിശീലനം നേടിയിരുന്നു. തിരുവനന്തപുരം സി.ഇ.ടി കോളജില്‍ ചേര്‍ന്ന് പഠിക്കാനാണു താല്‍പര്യമെന്നു അന്‍ഷാദ് സുബൈര്‍ പറഞ്ഞു. പിതാവ് സുബൈര്‍ ഓട്ടോറിക്ഷാ ഡ്രൈവറാണ്. മാതാവ് ഷാജിത, സഹോദരി സുനൈ.