ദുബൈ:24 മണിക്കൂറിനിടെ  യുഎഇ സ്റ്റാൻഡ് വിത്ത് ലബനാൻ ക്യാംപയിൻ്റെ ഭാഗമായി സമാഹരിച്ചത് 200 ടൺ സഹായവസ്‌തുകളാണ്. നാനൂറിലേറെ വളണ്ടിയർമാർ ചേർന്ന് പതിനായിരത്തിലേറെ ദുരിതാശ്വാസ കിറ്റുകളാണ് ലബനാനു വേണ്ടി തയ്യാറാക്കിയത്.

#Dubai community members, charities and humanitarian organisations come together at @expocitydubai to support the "UAE Stands with Lebanon" campaign. pic.twitter.com/JioMZTjz7c

— Dubai Media Office (@DXBMediaOffice) October 12, 2024

ഇസ്രായേൽ ആക്രമണം തുടരുന്ന ലബനാനിലെ ജനങ്ങൾക്കു വേണ്ടി, പ്രസിഡണ്ട് ശൈഖ് മുഹമ്മദ് ബിൻ സായിദിൻ്റെ നിർദേശ പ്രകാരമാണ് യുഎഇ സ്റ്റാൻഡ് വിത്ത് ലബനാൻ ക്യാംപയിൻ ആരംഭിച്ചത്. എമിറാത്തി സമൂഹത്തിൻ്റെ എല്ലാ വൈവിധ്യത്തിലും അവിഭാജ്യ ഘടകമായി മാറുന്ന മാനുഷിക ഐക്യദാർഢ്യത്തിന്റെ മൂല്യങ്ങളെയാണ് കാംപയ്‌നിൻ്റെ ലക്ഷ്യങ്ങൾ പ്രതിഫലിപ്പിക്കുന്നതെന്ന് ദി ബിഗ് ഹാർട്ട് ഫൗണ്ടേഷൻ ഡയരക്ടർ മറിയം അൽ ഹമ്മദി പറഞ്ഞു. ലോകമെമ്പാടുമുള്ള ദുരിതമനുഭവിക്കുന്ന ആളുകൾക്ക് ആശ്വാസം നൽകുന്നതിനുള്ള ചരിത്രപരമായ കൂട്ടായ്മകളുടെ ഭാഗമാണ് പ്രതിസന്ധിയിലായ ജനങ്ങൾക്കായി യുഎഇ ഏറ്റെടുത്തിരിക്കുന്ന നിരവധി ജീവകാരുണ്യ പ്രവർത്തനങ്ങളെന്ന് ഷാർജ ചാരിറ്റി അസോസിയേഷൻ എക്സിക്യൂട്ടീവ് ഡയരക്ടർ അബ്ദുല്ല ബിൻ ഖാദിം പറഞ്ഞു. ഇത് ബുദ്ധിമുട്ടുകൾ അനുഭവിക്കുന്ന സമൂഹങ്ങളോടുള്ള യു.എ.ഇ നേതൃത്വത്തിന്റെ അഗാധമായ ഉത്കണ്ഠയും അവരുടെ ദുരവസ്ഥ പരിഹരിക്കാനുള്ള ആഗ്രഹവും പ്രതിഫലിപ്പിക്കുന്നതാണെന്നും അദ്ദേഹം കൂട്ടിച്ചേർത്തു..

നാളെ അബൂദബി പോർട്ടിൽ സമാഹരണത്തിൻ്റെ രണ്ടാം ഘട്ടം നടക്കും. രാവിലെ ഒമ്പതു മുതൽ ഉച്ചയ്ക്ക് ഒരു മണി വരെ നടക്കുന്ന സമാഹരണത്തിൽ അബൂദബിയിലെ വിവിധ ഏജൻസികളും സ്ഥാപനങ്ങളും പങ്കാളികളാകും. ഷാർജയിൽ ഒക്ടോബർ 19നാണ് ക്യാംപയിൻ. ഷാർജ എക്സ്പോ സെൻ്ററാണ് വേദി. ഒക്ടോബർ എട്ടിന് ആരംഭിച്ച ക്യാംപയിൻ 21 വരെ തുടരും. ഒമ്പതു വിമാനങ്ങളിലായി 375 ടൺ സഹായവസ്‌തുക്കളാണ് യുഎഇ ഇതുവരെ ലബനാനിലെത്തിച്ചിട്ടുള്ളത്. ഇസ്രായേൽ ആക്രമണത്തിന് പിന്നാലെ ലബനാൻ ജനതയ്ക്കായി നൂറു ദശലക്ഷം യുഎസ് ഡോളറിൻ്റെ സഹായമാണ് പ്രസിഡണ്ട് ശൈഖ് മുഹമ്മദ് പ്രഖ്യാപിച്ചിരുന്നത്. രാജ്യത്ത് ഭവനരഹിതരായവർക്കു വേണ്ടി 30 ദശലക്ഷം ഡോളറിന്റെ അടിയന്തര സഹായം പ്രസിഡണ്ട് അനുവദിക്കുകയും ചെയ്തിരുന്നു.