പാലക്കാട്: സര്‍വശിക്ഷ അഭിയാന്‍ അട്ടപ്പാടിയിലെ ആദിവാസി വിദ്യാര്‍ഥികള്‍ക്കായി നടത്തുന്ന കൊകല്- സഹവാസ ക്യാംപിന് ഇന്ന് പാലക്കാട് ശിക്ഷക് സദനില്‍ തുടക്കമാകും. കുട്ടികള്‍ക്ക് അവരുടെ പ്രശ്‌നങ്ങള്‍ സ്വയം കണ്ടെത്തുന്നതിനും പരിഹരിക്കുന്നതിനും അതുവഴി ആത്മവിശ്വാസം വര്‍ധിപ്പിക്കുന്നതിനുമാണ് ക്യാംപ് നടത്തുന്നത്.
വ്യക്തിത്വ പരിശീലനം നല്‍കി നേതൃത്വപാടവമുള്ളവരാക്കി മാറ്റുക എന്നതാണ് ക്യാംപിന്റെ ലക്ഷ്യം. അട്ടപ്പാടിയിലെ വിവിധ സ്‌കൂളുകളിലെ അഞ്ച്, ആറ്, ഏഴ് ക്ലാസുകളില്‍ പഠിക്കുന്ന 50 വിദ്യാര്‍ഥികളാണ് സഹവാസ ക്യാംപില്‍ പങ്കെടുക്കുക. താമസവും ഭക്ഷണവും ശിക്ഷക് സദനിലാണ് ഒരുക്കിയിരിക്കുന്നത്.
 രാവിലെ 11ന്  അട്ടപ്പാടിയുടെ വികസനം എന്ന വിഷയത്തില്‍ ബി.എസ് വേണുഗോപാലും ഉച്ചക്ക് രണ്ടിന് ലഹരിവിമുക്ത ജീവിതം വിഷയത്തില്‍ എം.എന്‍ സുരേഷ് ബാബുവും ക്ലാസെടുക്കും. വിജിത പ്രേംകുമാറിന്റെ നേതൃത്വത്തില്‍ വൈകിട്ട് ആറിന് മോട്ടിവേഷന്‍ ക്ലാസ് നടക്കും. മോയന്‍ എല്‍.പി. സ്‌കൂളില്‍ രാത്രി എട്ടിന് എം.ബി രാജേഷ് എം.പി  കുട്ടികളുമായി സംവദിക്കും. തുടര്‍ന്ന് കലാപരിപാടികള്‍ നടക്കും.
മാര്‍ച്ച് 12 രാവിലെ എട്ടിന്  മോയന്‍ എല്‍.പി. സ്‌കൂളില്‍ പട്ടികജാതി-വര്‍ഗ- പിന്നാക്കക്ഷേമ നിയമ-സാംസ്‌കാരിക വകുപ്പ് മന്ത്രി എ.കെ ബാലന്‍ കുട്ടികളോടൊപ്പം പ്രഭാത ഭക്ഷണം പങ്കിടും.
10.30ന് വി.എസ് മുഹമ്മദ് ഇബ്രാഹിം വ്യക്തിത്വ വികസന ക്ലാസെടുക്കും. വൈകിട്ട് നാലിന് ഷാഫി പറമ്പില്‍ എം.എല്‍.എയോടൊപ്പം പാലക്കാട് നിന്നും പൊള്ളാച്ചിയിലേക്കും തിരിച്ചും കുട്ടികള്‍ ട്രെയിന്‍ യാത്ര നടത്തും. മാര്‍ച്ച് 13 രാവിലെ 10ന് ജില്ലാ കലക്ടര്‍ പി. മേരിക്കുട്ടിയുമായും കുട്ടികള്‍ക്ക് സംവദിക്കാന്‍ അവസരം ഉണ്ടാകും. തുടര്‍ന്ന് ജില്ലാ പഞ്ചായത്ത് പ്രസിഡന്റ് കെ. ശാന്തകുമാരിയുമായി മുഖാമുഖം പരിപാടിയും നടക്കും.
രാവിലെ 11ന് സിവില്‍ സ്റ്റേഷനിലെ വിവിധ വകുപ്പുകളുടെ പ്രവര്‍ത്തനം വിദ്യാര്‍ഥികള്‍ക്ക് നേരിട്ട് മനസ്സിലാക്കാനാകും. ഉച്ചക്ക് ശേഷം മലമ്പുഴ ഉദ്യാന സന്ദര്‍ശനം ഫാന്റസി പാര്‍ക്ക് സന്ദര്‍ശനവും സഹവാസ ക്യാംപിന്റെ ഭാഗമായി നടക്കും. അവസാന ദിവസമായ മാര്‍ച്ച് 14 രാവിലെ 8.30ന് അജയന്‍ ശാസ്ത്ര ക്ലാസെടുക്കും.
തുടര്‍ന്ന് എസ്.എസ്.എ സംസ്ഥാന പ്രോഗ്രാം ഓഫിസര്‍ കുട്ടികളുമായി സംവദിക്കുന്നതോടെ നാല് ദിവസം നീണ്ടു നില്‍ക്കുന്ന കൊകല് - സഹവാസ ക്യാംപിന് സമാപനമാകും.