വാണിമേല്‍: കല്ലാച്ചി വാണിമേല്‍ റോഡിന്റെ  ശോച്യാവസ്ഥ പരിഹരിക്കണമെന്നാവശ്യപ്പെട്ട് വാണിമേല്‍ പഞ്ചായത് യൂത്ത് ലീഗ് കമ്മിറ്റിയുടെ ആഭിമുഖ്യത്തില്‍ ഇന്ന് റോഡ് ഉപരോധിക്കും. യൂത്ത് ലീഗ് സമരത്തിന്റെ മൂന്നാം ഘട്ടമായാണ് ഉപരോധ സമരം.
നേരത്തെ കുത്തിയിരിപ്പു സമരം നടത്തുകയും എം.എല്‍.എയെ കണ്ടു നിവേദനം നല്‍കുകയും ചെയ്തിരുന്നു. അന്നൊക്കെ എം എല്‍ എ നല്‍കിയ ഉറപ്പു ലംഘിക്കപ്പെട്ട സാഹചര്യത്തിലാണ് യൂത്ത്‌ലീഗ് വീണ്ടും സമരത്തിനിറങ്ങുന്നത്.ഇതേ വിഷയത്തില്‍ കഴിഞ്ഞ മാസം പതിനൊന്നിന് സംയുക്ത മോട്ടോര്‍ തൊഴിലാളി യൂനിയന്റെ ആഭിമുഖ്യത്തില്‍ വാഹന പണിമുടക്ക് നടത്തിയിരുന്നു.
കല്ലാച്ചി വാണിമേല്‍ റോഡില്‍ കല്ലാച്ചി മുതല്‍ ചിയ്യൂര്‍ വരെയുള്ള ഭാഗമാണ് പൂര്‍ണമായും തകര്‍ന്നത്. ഇവിടെ കഴിഞ്ഞ കാല്‍ നൂറ്റാണ്ടോളമായി പരിഷ്‌കരണ പ്രവര്‍ത്തികളൊന്നും നടന്നിട്ടില്ല.
എന്നാല്‍ ലക്ഷങ്ങള്‍ മുടക്കി എല്ലാ വര്‍ഷവും അറ്റകുറ്റ പണികള്‍ നടക്കാറുണ്ട്. പൊതുവെ കാലാവര്‍ഷത്തിനു തൊട്ടു മുന്‍പേ നടക്കുന്ന ഈ താല്‍ക്കാലിക പ്രവൃത്തികൊണ്ടു ഒരുഗുണവും ലഭിക്കാറില്ല. കാല വര്‍ഷം കനക്കുന്നതോടെ ലക്ഷങ്ങള്‍ മുടക്കി അറ്റ കുറ്റ പണി ചെയ്യുന്ന റോഡ് തകര്‍ന്നു പോവുകയാണ്.അത് കൊണ്ട് തന്നെ മികച്ച പരിഷ്‌കരണ പ്രവര്‍ത്തിയാണ് ഈ റോഡിനു നാട്ടുകാര്‍ ആവശ്യപ്പെടുന്നത്.മണ്ഡലത്തില്‍ മുഖ്യ പരിഗണനയില്‍ ഉള്‍പ്പെടുത്തി വിപുലമായ എസ്റ്റിമേറ്റ് സര്‍ക്കാരിന് സമര്‍പ്പിച്ചിട്ടുണ്ടെന്നാണ് എം.എല്‍.എ യുടെ ഭാഗത്തു നിന്നുള്ള വിശദീകരണം.