.മുംബൈ: ഇന്ത്യന്‍ ക്രിക്കറ്റ് ടീം ക്യാപ്റ്റന്‍ വിരാട് കോഹ്‌ലി ഇംഗ്ലീഷ് കൗണ്ടി ടീം സറെയ്ക്കായി കളിക്കാനിറങ്ങും. ജൂലൈയില്‍ നടക്കാനിരിക്കുന്ന ഇന്ത്യയുടെ ഇംഗ്ലണ്ട് പര്യടനത്തിന് മുന്നോടിയായി കോഹ്‌ലി കൗണ്ടിയില്‍ കളിക്കുമെന്നും എന്നാല്‍ കോഹ്‌ലി കൗണ്ടി കളിക്കുന്നതിന് പകരം അഫ്ഗാനിസ്ഥാനെതിരായ ടെസ്റ്റ് കളിക്കണമെന്ന് ബി.സി.സി.ഐയിലെ ഒരു വിഭാഗം നിലപാടെടുത്തതായും വാര്‍ത്തകളുണ്ടായിരുന്നു. ജൂണ്‍ 14 മുതല്‍ 18 വരെയാണ് അഫ്ഗാനിസ്ഥാനെതിരായ ടെസ്റ്റ് മത്സരം.
ടെസ്റ്റ് പദവി കിട്ടിയ ശേഷമുള്ള അഫ്ഗാനിസ്ഥാന്റെ ആദ്യ പോരാട്ടം എന്ന ചരിത്ര പ്രാധാന്യവും മത്സരത്തിനുണ്ട്.
അതേസമയം അഭ്യൂഹങ്ങള്‍ക്ക് വിരാമമിട്ട് സറെ ടീം ഔദ്യോഗികമായി ഇന്ത്യന്‍ നായകനുമായി കരാറിലെത്തിയതായി വെബ് സൈറ്റിലൂടെ വ്യക്തമാക്കി. ജൂണില്‍ നടക്കുന്ന കൗണ്ടി ചാംപ്യന്‍ഷിപ്പില്‍ സറെയ്ക്കായി കോഹ്‌ലി കളത്തിലിറങ്ങും.
ജൂണ്‍ ഒന്‍പത് മുതല്‍ 12 വരെ സതാംപ്ടനില്‍ നടക്കുന്ന ഹാംപ്‌ഷെയറിനെതിരായ മത്സരത്തില്‍ ഇന്ത്യന്‍ നായകന്‍ അരങ്ങേറും.