കുറ്റ്യാടി: സമസ്ത കേരള ജംഇയ്യത്തുല്‍ ഉലമയുടെ നൂറാംവാര്‍ഷികാഘോഷത്തിന്റെ ഭാഗമായി എസ്.കെ.എസ്.എസ്.എഫ് കുറ്റ്യാടി മേഖലാ കമ്മിറ്റി ഏഴിന് സംഘടിപ്പിക്കുന്ന സമസ്ത ആദര്‍ശ സമ്മേളനം, ജില്ലാ പൈതൃകമുന്നേറ്റ യാത്ര ഉദ്ഘാടനം എന്നിവയുടെ ഒരുക്കങ്ങള്‍ പൂര്‍ത്തിയായതായി സംഘാടക സമിതി ഭാരവാഹികള്‍ പത്രസമ്മേളനത്തില്‍ അറിയിച്ചു. വൈകിട്ട് മൂന്നിന് കൊടക്കലില്‍ നിന്നാരംഭിച്ച് കുറ്റ്യാടി സമ്മേളന നഗരിയില്‍ സമാപിക്കുന്ന റാലിയില്‍ പ്രത്യേകം സജ്ജരായ 1001 പ്രവര്‍ത്തകര്‍ അണിനിരക്കും.
നാലിന് നടക്കുന്ന പൊതുസമ്മേളനം സമസ്ത പ്രസിഡന്റ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. സ്വാഗതസംഘം കമ്മിറ്റി ചെയര്‍മാന്‍ ടി.വി.സി അബ്ദുസ്സമദ് ഫൈസി അധ്യക്ഷനാകും.
ദീനീരംഗത്തെ സംഭാവന പരിഗണിച്ച് സി.എസ്.കെ തങ്ങള്‍ കുറ്റ്യാടിയെ ചടങ്ങില്‍ ആദരിക്കും. സപ്ലിമെന്റ് പ്രകാശനം സമസ്ത കേന്ദ്ര മുശാവറ അംഗം ചേലക്കാട് മുഹമ്മദ് മുസ്‌ലിയാരും വെബ്‌സൈറ്റ് ലോഞ്ചിങ് പാറക്കല്‍ അബ്ദുല്ല എം.എല്‍.എയും നിര്‍വഹിക്കും. സിവില്‍ സര്‍വിസ് പരീക്ഷയില്‍ 693-ാം റാങ്ക് നേടിയ ശാഹിദ് ഹസനി തിരുവള്ളൂരിനെ ചടങ്ങില്‍ അനുമോദിക്കും.
സത്താര്‍ പന്തല്ലൂര്‍, എം.ടി അബൂബക്കര്‍ ദാരിമി, സയ്യിദ് മുബശ്ശിര്‍ തങ്ങള്‍ ജമലുല്ലൈലി, ഒ.പി അഷ്‌റഫ് , ഖാസിം നിസാമി എന്നിവര്‍ പ്രമേയ പ്രഭാഷണം നടത്തും. സി.എച്ച് മഹ്മൂദ് സഅദി, സെക്രട്ടറി അലി തങ്ങള്‍ പാലേരി പങ്കെടുക്കും. ഇ. അബ്ദുല്‍ അസീസ് മാസ്റ്റര്‍, യു.കെ അബ്ദുല്‍ ഹമീദ്ഹാജി, പി.കെ ഹമീദ്, പി.കെ അബ്ദുറഹ്മാന്‍, ഇ.എ റഹ്മാന്‍, ടി.പി റഫീഖ്, വി.കെ റിയാസ് മാസ്റ്റര്‍, ഷൈജല്‍ അഹമ്മദ്, കെ.പി ശൗക്കത്തലി മാസ്റ്റര്‍ പങ്കെടുത്തു.