കൊച്ചി : നെടുമ്പാശേരി സ്വര്‍ണക്കടത്തു കേസിലെ പ്രതികള്‍, തങ്ങളെ കോഫെപോസ നിയമപ്രകാരം കരുതല്‍ തടങ്കലിലടച്ചതിനെതിരെ നല്‍കിയ ഹരജികള്‍ ഹൈക്കോടതി ജൂലൈ ഏഴിനു പരിഗണിക്കാനായി മാറ്റി. ജസ്റ്റിസ് സി.കെ അബ്ദുര്‍ റഹീം, ജസ്റ്റിസ് ബി. സുധീന്ദ്രകുമാര്‍ എന്നിവരുള്‍പ്പെട്ട ഡിവിഷന്‍ ബെഞ്ചാണ് ഹരജികള്‍ പരിഗണിക്കുന്നത്. ഇന്നലെ ഹരജികള്‍ പരിഗണനയ്ക്കു വന്നപ്പോള്‍ ബംഗളൂരുവില്‍ നിന്ന് അഭിഭാഷകനെ കൊണ്ടുവരുന്നതിനായി സമയം അനുവദിക്കണമെന്ന് ഹരജിക്കാര്‍ ആവശ്യപ്പെട്ടു.

ഇതു കണക്കിലെടുത്താണ് ജൂലായ് ഏഴിലേക്ക് മാറ്റിയത്. നേരത്തെ ജസ്റ്റിസ് കെ.ടി ശങ്കരന്‍, ജസ്റ്റിസ് എ. ഹരിപ്രസാദ് എന്നിവരുള്‍പ്പെട്ട ഡിവിഷന്‍ ബെഞ്ചാണ് ഹരജികള്‍ പരിഗണിച്ചിരുന്നത്. കരുതല്‍ തടങ്കിലിനെതിരേ നല്‍കിയ ഹരജികളില്‍ അനുകൂല വിധിയുണ്ടാകാന്‍ പ്രതികള്‍ കോഴ വാഗ്ദാനം ചെയ്തുവെന്ന് കോടതിയില്‍ പറഞ്ഞ് കേസ് പരിഗണിക്കുന്നതില്‍ നിന്ന് ജസ്റ്റിസ് കെ.ടി ശങ്കരന്‍ പിന്‍മാറിയിരുന്നു. ഇതേതുടര്‍ന്നാണ് ഹരജികള്‍ മറ്റൊരു ബെഞ്ചിലേക്കു മാറ്റിയത്.