മുക്കം: കാരശ്ശേരി ഗ്രാമപഞ്ചായത്തിലെ പുതിയോത്ത് താഴത്ത് താമസിക്കുന്ന പാര്‍വതിയമ്മയുടെ പ്രാര്‍ഥ
ന സഫലം. പാര്‍വതിക്കും കുടുംബത്തിനും വീട് നിര്‍മിച്ചു നല്‍കുന്ന പ്രവൃത്തി യൂത്ത്‌ലീഗ് പ്രവര്‍ത്തകര്‍ ഏറ്റെടുത്തു. യൂത്ത് ലീഗ് കാരശേരി വാര്‍ഡ് കമ്മിറ്റിയാണ് ഈ അമ്മയുടേയും മകളുടേയും ദുരിതാവസ്ഥ കണ്ട് വീട് നിര്‍മാണത്തിനായി മുന്നോട്ട് വന്നത്. ബൈത്തുറഹ്മ പദ്ധതിയില്‍ ഉള്‍പ്പെടുത്തിയാണ് വീട് നിര്‍മിച്ച് നല്‍കുക. ഇവരുടെയൊരു ചിരകാലാഭിലാഷമായിരുന്നു മഴയും വെയിലും കൊള്ളാത്ത ഒരു വീടെന്നത്. ഇതിനായി ഇവര്‍ മുട്ടാത്ത വാതിലുകളില്ല. വീടെന്ന് പറയാനാവാത്ത ഈ ഓലക്കൂരയിലാണ്
വര്‍ഷങ്ങളായി തന്റെ പ്ലസ് വണ്ണിന് പഠിക്കുന്ന മകള്‍ക്കൊപ്പം ഭീതിയോടെ കഴിയുന്നത്. പാര്‍വതിയമ്മയുടെ ദുരിത ജീവിതത്തെ കുറിച്ച് കഴിഞ്ഞ ദിവസം മാധ്യമങ്ങള്‍ റിപ്പോര്‍ട്ട് ചെയ്തതോടെയാണ് ഇവരുടെ കദനകഥകള്‍ പുറം ലോകമറിയുന്നത്. വര്‍ഷങ്ങള്‍ക്ക് മുന്‍പ് ഭര്‍ത്താവ് ഉപേക്ഷിച്ച പാര്‍വതിക്ക് രണ്ട് മക്കളാണ്.18 കാരന്‍ ബബിത്തും, പ്ലസ് വണ്‍ വിദ്യാര്‍ഥിനി അശ്വതിയും.
രോഗങ്ങള്‍ അലട്ടുന്ന പാര്‍വതി തന്നാലാവുന്ന ജോലി ചെയ്താണ് മക്കളെ പോറ്റിയതും അവരെ പഠിപ്പിക്കുന്നതും. എന്നാല്‍ പണിക്ക് പോകാന്‍ വയ്യാതായതോടെ മൂത്ത മകന്‍ പഠിപ്പു നിര്‍ത്തി. കുടുംബഭാരം ഏറ്റെടുക്കേണ്ടി വന്നു.
ഈ 18 കാരനിലാണിപ്പോള്‍ ഈ കുടുംബത്തിന്റെ ചെലവും സഹോദരിയുടെ പഠനത്തിന്റെ ഉത്തരവാദിത്വവും. ഇവര്‍ താമസിക്കുന്ന മണ്‍കുടില്‍ കണ്ടാല്‍ മാത്രംമതി ഇവരുടെ കഷ്ടപ്പാടുകളെ കുറച്ച് മനസിലാകാന്‍. മണ്‍കട്ടകള്‍
അടുക്കി വച്ച് അതിന് മുകളില്‍ ഓല കൊണ്ട് മേഞ്ഞഒറ്റമുറി വീട്. മഴക്കാലമായാല്‍ ചോര്‍ച്ച കാരണം കിടക്കാന്‍ കഴിയില്ല.
വീടിന്റെ ചുമരുകളും ഓലകൊണ്ട് തന്നെ. ഓലകീറിയ മേല്‍ക്കൂരക്ക് താങ്ങായി പ്ലാസ്റ്റിക് ഷീറ്റുകളും ചാക്കുകളുമാണ് മറ തീര്‍ത്തിരിക്കുന്നത്. ഒരു വാതില്‍ പോലുമില്ലാത്ത ഈ കൂരയിലാണ് ഈയമ്മ തന്റെ മകളുമായി ഭീതിയോടെ കഴിയുന്നത്.
യൂത്ത് ലീഗ് പ്രവര്‍ത്തകരുടെ ഇടപെടലോടെ ഈ ദുരവസ്ഥയ്ക്ക് പരിഹാരമാകുകയാണ്. പാര്‍വതിയുടെ വീട്ടിലെത്തിയ യൂത്ത് ലീഗ് സംസ്ഥാന സീനിയര്‍ വൈസ് പ്രസിഡന്റ് നജീബ് കാന്തപുരം വീടു നിര്‍മാണം ഏറ്റെടുക്കുന്നതായി പ്രഖ്യാപിച്ചു.
തിരുവമ്പാടി മണ്ഡലം യൂത്ത് ലീഗ് സെക്രട്ടറി നിസാം കാരശേരി, അബു സുഫിയാന്‍, വി.പി ഷഫീഖ്, ഹിദാഷ് പറശ്ശേരി, കെ ജുനൈദ്, മുട്ടാത്ത് മുസ്തഫ, ഇ.കെ നാസര്‍ , വി.പി അനീസ്, ഇ.കെ സാബിത്ത്,കെ.പി മസൂര്‍ സംബന്ധിച്ചു.
ഇവരെ സഹായിക്കുന്നതിനായി മുക്കം ഐ.സി.ഐ.സി ബാങ്കില്‍ 265401500922 നമ്പറില്‍ എക്കൗണ്ട് ആരംഭിച്ചിട്ടുണ്ട്. ഐ.എഫ്.എസ്.സി 0002654 ഫോണ്‍:+919846364844.