മലപ്പുറം: എസ്.വൈ.എസ്.നടത്തുന്ന ജലസംരക്ഷണ കാംപയിനോടനുബന്ധിച്ചു ബോധനപത്രിക വീടുകളില്‍ വിതരണം ചെയ്യും. ജലസംരക്ഷണത്തിന്റെ അനിവാര്യത, ജലദൗര്‍ലഭ്യം പരിഹരിക്കാനുള്ള നടപടിക്രമങ്ങള്‍, ജലവിനിയോഗ നിയമങ്ങള്‍ എന്നിവ വിശദമാക്കുന്ന പത്രിക അടുത്ത 19ന് വീടുകളിലെത്തിക്കും.
എസ്.വൈ.എസ് ആമില അംഗങ്ങളുടെ നേതൃത്വത്തില്‍ ജനസമ്പര്‍ക്ക പരിപാടിയിലൂടെയാണ് ബോധവല്‍ക്കരണ സന്ദേശം നടപ്പാക്കുന്നത്. മഹല്ലുതല ബോധവല്‍ക്കരണ പരിപാടികള്‍ ആസൂത്രണത്തിനായി 16ന് മണ്ഡലം തലങ്ങളില്‍ ഖത്വീബ് സംഗമങ്ങളും 17ന് ജമുഅയ്ക്കു ശേഷം പള്ളികളില്‍ ഉദ്‌ബോധന പ്രസംഗവും നടക്കും. ജലദിനമായ 22ന് യൂനിറ്റുകളിലെ ജലസ്രോതസുകളില്‍ ശുചീകരണ പ്രവര്‍ത്തനങ്ങളില്‍ പങ്കാളികളാകും.
കാംപയിന്‍ ഉദ്ഘാടനത്തോടനുബന്ധിച്ച് ഇന്നലെ മലപ്പുറത്തു വിവിധ വിഷയങ്ങളില്‍ പ്രമുഖര്‍ സംവദിച്ചു. ജലോപയോഗത്തില്‍ അതിരുവിടുമ്പോഴാണ് വരള്‍ച്ച ശിക്ഷയാകുന്നതെന്നു ബോധന പത്രിക പ്രകാശനം ചെയ്ത ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ പറഞ്ഞു. ജലസംരക്ഷണ പ്രവര്‍ത്തനങ്ങളില്‍ എല്ലാവരും ഒത്തുചേരണമെന്നു പി. ഉബൈദുല്ല എം.എല്‍.എ പറഞ്ഞു. ജലസംരക്ഷണത്തിനായി നടത്തുന്ന പദ്ധതികള്‍ വിജയിപ്പിക്കണമെന്നും അഴിമതികളുടെ നിറങ്ങളില്ലാത്ത പദ്ധതികള്‍ ഇക്കാര്യത്തില്‍ വളര്‍ത്തിയെടുക്കേണ്ടത് അനിവാര്യമാണെന്നും ഡെപ്യൂട്ടി കല്കടര്‍ സി.എ റഷീദ് പറഞ്ഞു.